Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 314 Hüküm no: 286 Orijinal metin no: [41a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Koçı’nın Müslüman olmadan önce tasarrufunda olan Premedi kazasındaki kilise ve manastır fukarası vakfına ait bağı vakfın mütevellisi Todori v. Hıristo’ya teslim ettiği Vilâyet-i Rumeli’nde Avlonya sancağında Premedi kazâsına [tâbi‘] Silinse? nâm karye sâkinlerinden Ali b. Koçı nâm kimesne meclis-i şer‘-i hatîr-i lâzimü’t-tevkīrde karye-i mezbûrede vâki‘ kenîse ve manastırın fukarâsı evkāfı mütevellisi olan bâ‘isü’s-sifr Todori v. Hıristo nâm zimmî muvâcehesinde tav‘an ikrâr ve i‘tirâf edip karye-i mezbûrede vâki‘ kenîse ve manastır evkāfından olup yine karye-i mezbûre sınırında Velenbe nâm mahalde vâki‘ bir tarafı vâdi ve bir tarafı Hamza b. Hüseyin bağı ve iki tarafı kenîse-i mezbûreye vakıf bağlar ile mahdûd mahsûlü kenîse-i mezbûre fukarâsına meşrût bir kıt‘a vakıf bağa babam hayatda oldukça alâ tarîkı’l-müsâfât zabt ve tasarruf edip ba‘de helâkihî ben dahi târih-i kitâba gelince mutasarrıf idim hâlâ şeref-i İslâm[la] müşerref olduğum ecilden akd-i mezkûru fesh ve bağ-ı mezkûru mütevellî-i mezbûra teslîm eyledim dedikde gıbbe’t-tasdîkı’ş-şer‘î mütevellî-i mezbûr Todori dahi meclis-i şer‘-i şerîfde merkūm Ali mahzarında bağ-ı mezkûru kabz ve târih-i kitâba gelince her senede hâsıl olan mahsûlden cânib-i vakfa âid olan hisseyi mezbûr Ali yedinden bi’t-tevliye tamâmen ahz u kabz eylediğini tav‘an ikrâr ve i‘tirâf etmeğin gıbbe’t-tasdîk mâ-vaka‘a bi’t-taleb ketb olundu. Tahrîren fi’l-yevmi’s-sâdis ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mustafa b. Hamza, Mustafa b. Hasan, Oruc b. Mehmed, Durmuş b. Koçı, Sinan b. Ali ve gayruhüm mine’l-[hâzırîn.]