Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 316 Hüküm no: 289 Orijinal metin no: [41b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kerime bt. Mehmed’in mehir hususunda boşandığı kocası Kadı Seyyid Abdülkerim b. Seyyid Mehmed Efendi ile sulh olduğu Mahmiye-i İstanbul’da Akşemseddin mahallesi sâkinelerinden Kerime bt. Mehmed nâm hâtun meclis-i şer‘-i hatîr-i lâzimü’t-tevkīrde Anadolu kuzâtından olup merkūmenin zevc-i mutallıkı olan sâhibü’l-kitâb fahrü’l-kuzât es-Seyyid Abdülkerim b. es-Seyyid Mehmed Efendi mahzarında tav‘an ikrâr ve i‘tirâf edip zevcim merkūm es-Seyyid Abdülkerim Efendi beni talâk-ı bâyin ile tatlîk etmekle nikâhımız ma‘kūd olup zimmetinde mütekarrir olan altı bin akçe mehr-i müeccelim zimmetinde kalmışidi hâlâ zafer bulup meblağ-ı mezbûru merkūm es-Seyyid Abdülkerim Efendi’den taleb ve da‘vâ ettiğimde cevâbında mehr-i müeccel-i mezkûr üzerine muhâla‘a olup herbirimiz âharın zimmetini zevciyyete ve gayra müte‘allika âmme-i de‘âvâdan ibrâ-i âmm-ı kātı‘u’n-nizâ‘la ibrâ ve ıskāt eyledik deyu da‘vâyı def‘ etdikde inkârım ile mezbûrdan def‘-i meşrûhuna [mutâbık] beyyine taleb olunup ityân-ı beyyineden aczinden sonra beynimize muslihûn tavassut edip merkūm Seyyid Abdülkerim Efendi ile beni mehr-i müeccel-i mezkûrum da‘vâsından işbu hâzır bi’l-meclis olan bir sîm gılâflı ve sîm kabzalı kılıç ve bir mutellâ cedîd dülbend ve iki riyâlî guruş üzerine beni sulh eylediklerinde ben dahi sulh-ı mezbûru kabûl ve bedel-i sulh olan eşyâ-i mezkûreyi meclis-i sulhda bi-a‘yânihâ yedinden ahz u kabz edip merkūm Seyyid Abdülkerim Efendi’nin zimmetini mehr-i müeccel-i mezkûrum da‘vâsından ve beni tezevvüc ettiği günden târih-i kitâba gelince beynimizde vukū‘ bulan zevciyyete ve gayra müte‘allika âmme-i hukūk da‘vâsından mezbûrun zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Tahrîren fi’l-yevmi’s-sânî ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mehmed Efendi b. Veli Efendi, Salih Efendi b. Salih, Mustafa Efendi el-kâtib, diğer Mustafa Efendi el-kâtib, es-Seyyid Mehmed Çavuş b. es-Seyyid Hamza, es-Seyyid Enbiyâ Çavuş b. ( ) ve gayruhüm mine’l-[hâzırîn.]