Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 317 Hüküm no: 290 Orijinal metin no: [41b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sunullah Efendi b. Ebubekir’in alacak hususunda Berkofça eski kadısı Ömer Efendi’nin zimmetini ibra ettiği Rumeli kuzâtından olup mahmiye-i İstanbul’da Sivasî Efendi merhûmum tekyesi kurbünde sâkin olan umdetü’l-kuzât Sun‘ullah Efendi b. Ebîbekir meclis-i şer‘-i hatîr-i lâzimü’t-tevkīrde kezâlik Rumeli kuzâtından olup sâbıkā Berkofça kādısı olan umdetü’l-kuzât Ömer Efendi b. ( ) mahzarında tav‘an ikrâr ve i‘tirâf edip merkūm Ömer Efendi zimmetinde cihet-i deyn-i şer‘îden iki yüz kırk riyâlî guruş hakkım olup meblağ-ı mezbûru tamâmen ahz u kabz ettiğimden mâ‘adâ yedimde ve malımdan iştirâ ve kabz ettiği bir re’s kır at semeninden elli riyâlî guruş ve bir re’s doru tay at semeninden kırk riyâlî guruş cem‘an doksan riyâlî guruş hakkım olmağla taleb ettiğimde merkūm Ömer Efendi zikrolunan elli riyâlî guruşa iştirâ ve kabzı i‘tirâf edip ve doru tay atı on beş riyâlî guruşa iştirâ ettim deyu zimmetinde ancak altmış beş riyâlî guruş hakkım olduğunu i‘tirâf edip mâ‘adâ otuz beş riyâlî guruşumu inkâr etmekle i‘tirâfı üzere meblağ-ı mezbûr altmış beş riyâlî guruşumu tamâmen bana def‘ ve teslîm edip ben dahi yedinden ahz u kabz eyledim min ba‘d Ömer Efendi zimmetinde cihet-i deyn-i şer‘îden olan iki yüz kırk riyâlî guruş hakkıma ve zikrolunan kır at semeninden olan elli riyâlî guruş hakkıma müte‘allika merkūm Ömer Efendi üzerine bi-vechin mine’l-vücûh ve sebebin mine’l-esbâb da‘vâ ve hakkım yokdur dedikde mukırr-ı mezbûru vech-i meşrûh üzere cârî ve sâdır olan ikrârında el-mukarru lehü’l-mezbûr dahi bi’l-müvâcehe tahkīk ve bi’l-müşâfehe tasdîk edicek mâ-hüve’l-vâki‘ bi’t-taleb ketb olundu. Fi’l-yevmi’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Salih Efendi el-kādî, Mehmed Efendi el-kādî, el-Hâc Abbas el-muhzır, İsa Bey b. Ahmed ve gayruhüm mine’l-[hâzırîn.]