Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 322 Hüküm no: 296 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ramazan’ın miras hissesinin tahsili hususunda vekil tayin ettiği Mehmed Ağa’nın zimmetini ibra ettiği Mahrûse-i Üsküdar’da Gerede mahallesinde sâkin iken bundan akem vefât eden Hâcı Ahmed Beşe b. Nurbeyi nâm kimesnenin verâseti zevce-i metrûkesi Âişe bt. İbrahim nâm hâtun ile sulbî sagīr oğlu Mehmed’e münhasıra olup kable’l-kısme mezbûr Mehmed dahi vefât edip verâseti vâlidesi mezbûre Âişe ile li-ebeveyn ammisi el-Hâc Ramazan b. ( ) nâm kimesneye münhasıra olduğu şer‘an zâhir ve mütebeyyin oldukdan sonra mezbûr el-Hâc Ramazan meclis-i şer‘-i hatîr-i lâzimü’t-tevkīrde işbu bâ‘isü’l-vesîka Mehmed Ağa b. Abdullah mahzarında ikrâr ve takrîr-i kelâm edip müteveffâ-yı mezbûrun ile’l-vefât mülkü olup mahrûse-i mezbûrede Balaban İskelesi’nde vâki‘ lede’l-ahâlî ma‘lûmü’l-hudûd bir göz at değirmeni bir ekmekçi fırını ve sâir terekesi yirmi dört sehm i‘tibâr olunup sihâm-ı mezbûreden on sehmi mezbûre Âişe’ye ve on dört sehmi bana isâbet ve intikāl etmekle ben zikrolunan fırın ve değirmende olan on dört sehm hisse-i şâyi‘amı bey‘ ve kabz-ı semene tarafımdan mezbûr Mehmed Ağa’yı tevkîl ol dahi ba‘de kabûli’l-vekâle zikri mürûr eden değirmende olan hisse-i meşrûhamı iki yük otuz bin akçeye bey‘ ve kabz-ı semen eyledikden sonra semen-i mezbûru bana tamâmen def‘ ve teslîm ben dahi ahz u kabz eylediğimden gayrı müteveffâ-yı mezbûrun sâir terekesinden dahi bana isâbet eden on dört sehm hisse-i şer‘iyyemi vâzı‘u’l-yed olanlardan da‘vâya ve ahz u kabza ve bi’l-cümle tereke-i müteveffâ-yı mezbûra müte‘allika cemî‘ de‘âvâya tarafımdan mezbûr Mehmed Ağa’yı tevkîl ol dahi kabûl ve merâsimini edâ eyleyip kendiye yüz kırk riyâlî guruş ücret vermişidim el-hâletü hâzihî mezbûr Mehmed Ağa tarafımdan vekîlim olmağla beynimizde cereyân eden ahz u i‘tâya ve kendiye ücret verdiğim meblağ-ı mezbûr yüz kırk riyâlî guruş ve bi’l-cümle hukūk-ı ma‘lûme ve mechûleye müte‘allika cemî‘ de‘âvî ve mutâlebâtdan mezbûr Mehmed Ağa’yı ibrâ-i âm ile ibrâ ve ıskāt eyledim min ba‘d mezbûr Mehmed Ağa kıbelinde bi-vechin mine’l-vücûh hak ve alâkam kalmadı dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Ahmed Bey b. Abdulbâki, Mehmed Ağa b. Abdullah, Mehmed Çelebi b. Haydar, Süleyman Beşe b. Abdullah, Mustafa Beşe b. Abdullah, Mustafa b. Halil, Osman Beşe çukadâr, İsa Bey b. Ahmed ve gayruhüm mine’l-[hâzırîn.]