Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 327 Hüküm no: 302 Orijinal metin no: [43a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Raziye bt. Mehmed’in satışı iptal edilen cariyenin bedelini iade etmesi için Hatip Mustafa Efendi’ye dört ay süre verdiği Mahmiye-i İstanbul’da Çoban Çavuş mahallesinde sâkine Raziye bt. Mehmed nâm hâtunun zevci ve tarafından husûs-ı âti’l-beyâna vekîl olup mezbûrenin zâtını ma‘rifet-i şer‘iyye ile ârifân olan Mehmed Çelebi b. ( ) ve Hüseyin b. Mahmud nâm kimesneler şehâdetleri ile şer‘an vekâleti sâbite olan umdetü’l-emâcid ve’l-a‘yân Ali Ağa b. Haydar meclis-i şer‘-i hatîr-i lâzimü’t-tevkīrde mahmiye-i mezbûrede merhûm ve mağfûrun-leh Ebû’l-feth Sultân Mehmed Hân Câmi‘-i şerîfinde hatîb olan umdetü’l-hutabâ’i’l-kirâm Mustafa Efendi b. Receb mahzarında bi’l-vekâle ikrâr ve takrîr-i kelâm edip mezbûr Mustafa Efendi bundan akdem Rusiyyetü’l-asl Gülazar bt. Abdullah nâm câriye-i memlûkesini iki yüz on kıt‘a riyâlî guruşa müvekkile-i mezbûreye bâtten bey‘ ve teslîm ol dahi iştirâ ve tesellüm ve def‘-i semen eyledikden sonra rızâları ile bey‘-i mezbûru ikāle etmeleri ile câriye-i mezbûreyi merkūm Mustafa Efendi’ye geri red ve teslîm, mezbûr Mustafa Efendi dahi ba‘de’l-kabz semen-i mezbûr iki yüz on riyâlî guruş mezbûr Mustafa Efendi zimmetinde kalmağla meblağ-ı mezbûrun mezbûr Mustafa Efendi def‘aten edâya iktidârı olmayıp taksîte tâlib oldukda meblağ-ı mezbûrun hâlâ seksen riyâlî guruşunu mezbûr Mustafa Efendi verip ba‘de yüz otuz riyâlî guruşunu târih-i kitâbdan üç ay tamâmına değin her ayda kırkar riyâlî guruş verip ba‘dehû bir ayda dahi on riyâlî guruş vermek üzere cem‘an dört ay tamâmına değin [43b] vekâletim hasebiyle mezbûr Mustafa Efendi’ye taksît edip ol dahi vech-i muharrer [üzere] taksît-i mezbûru kabûl eyledi dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mehmed Çavuş b. Ca‘fer el-mübâşir, Osman Beşe çukadâr, İsa Bey b. Ahmed, Mehmed Çelebi b. Haydar ve gayruhüm mine’l-[hâzırîn.]