Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 328 Hüküm no: 303 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Norsiz b. Kapril’in vasisi olduğu küçük kardeşi Şehzede’ye on beş bin beş yüz yirmi beş akçe borcu olduğunu ikrar ettiği Mahmiye-i İstanbul’da Lanka Dülbendci Hüsam mahallesinde sâkine iken hâlike olan Güllü bt. Ağya nâm Ermeniyenin verâseti zevci Kapril nâm Ermeni ile sadriye sagīre kızı Şehzede’ye münhasıra olup kable’l-kısme zevci mezbûr Kapril dahi hâlik olup verâseti sulbiye kızı sagīre-i mezbûre Şehzede’ye ve vâlidesi Manuş nâm Ermeniye’ye ve li-ebeveyn karındaşları Danyel ve Norsiz nâm Ermenilere münhasıra olduğu şer‘an mütehakkık oldukdan sonra sagīre-i mezbûre Şehzede’nin tesviye-i umûruna kıbel-i şer‘den mansûb vasîsi olan mezbûr Norsiz meclis-i şer‘-i hatîr-i lâzimü’t-tevkīrde kendi üzerinde nâzır olan Avanos v. Toros nâm Ermeni muvâcehesinde tav‘an ikrâr ve i‘tirâf edip sagīre-i mezbûre Şehzede’ye vâlidesi hâlike-i mezbûreden irs-i şer‘le intikāl eden on bir bin akçe hisse-i şer‘iyyesini ve babası hâlik-i mezbûr Kapril’den intikāl eden iki bin yedi yüz akçe ki cem‘an masârıfima sarfla istihlâkimden sonra zimmetimde deyn olan on üç bin yedi yüz akçe ve semeni târih-i kitâbdan bir sene tamâmına değin müeccel müşterâ ve makbûz mor çuka semeninden dahi bin sekiz yüz yirmi beş akçe ki cem‘an sagīre-i mezbûreye zimmetimde on beş bin beş yüz yirmi beş akçe lâzimü’l-edâ ve vâcibü’l-kazâ deynim vardır dedikde mukırr-ı mezbûr Norsiz’i vech-i meşrûh üzere cârî olan ikrârında nâzır-ı merkūm Avanos bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: İsa Bey b. Ahmed, Ca‘fer b. Abdullah, İsmail Çelebi b. Yunus, Mehmed Çelebi b. Haydar, Osman Beşe çukadâr ve gayruhüm mine’l-[hâzırîn.]