Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 329 Hüküm no: 305 Orijinal metin no: [43b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice Hatun bt. Razi Efendi’nin mülk menzilini Süleyman Beşe b. Abdullah’a bin yedi yüz kırk guruşa sattığı Dâru’l-hilâfeti’l-aliyye Kostantıniyye el-mahmiyye’de Çıkrıkçı Kemal mahallesinde sâkine mefharü’l-muhadderât Hadice Hâtun bt. el-merhûm Râzi Efendi husûs-ı âti’z-zikri ikrâra vekîl olup mûmâ-ileyhânın zâtını ma‘rifet-i şer‘iyye ile ârifân olan Mustafa Çelebi b. Mehmed ve Mehmed b. Ahmed nâm kimesneler şehâdetleri ile şer‘an vekâleti sâbite olan Mehmed Beşe b. Abdullah nâm râcil meclis-i şer‘-i hatîr-i lâzimü’t-tevkīrde işbu bâ‘isü’l-vesîka Süleyman Beşe b. Abdullah mahzarında bi’l-vekâle ikrâr ve takrîr-i kelâm edip mahmiye-i mezbûrede İskender Paşa mahallesinde vâki‘ bir tarafı Bıçakçı İbrahim Paşa mülküne ve iki tarafı Şa‘ban Efendi b. Rıdvan mülküne ve bir tarafı tarîk-ı âmma müntehî muhavvateyni muhtevî olup muhavvata-i dâhiliyyesi bir bâb fevkānî oda ve bir sofa ve bi’r-i mâ ve matbah ve tahtânî bir oda ve zîr-i zemîn ve bahçe ve bir kenîfi ve muhavvata-i hâriciyyesi fevkānî ve tahtânî iki bâb odaları ve ahırı müştemil mülk menzil Mehmed Beşe b. Ahmed nâm kimesnenin ile’l-vefat mülkü olup ba‘de vefâtihî zâhirde zevce-i metrûkesi Fâtıma bt. Şa‘ban nâm hâtundan gayrı vâris-i ma‘rûfu olmamağla terekesinin rub‘u mezbûre Fâtıma’ya ve selâse-i erbâ‘ı cânib-i beytü’l-mâle âid olmağla menzil-i mahdûd-ı mezbûru emîn-i beytü’l-mâl olan Mehmed Ağa b. ( ) nâm kimesne ile merkūme Fâtıma Hâtun’un bin altmış bir senesi şehr-i Ramazânü’l-mübâreki’nde müvekkile-i mezbûreye yüz yirmi beş bin akçeye bâtten bey‘ ve teslîm ve kabz-ı semen etmeleri ile menzil-i mahdûd-ı mezbûr müvekkile-i mezbûrenin mülk-i müşterâsı olmuşidi hâlâ müvekkile-i mezbûre menzil-i mahdûd-ı mezbûru bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile bin yedi yüz kırk kıt‘a riyâlî kebîr guruşa mezbûr Süleyman Beşe’ye bey‘ ve teslîm ol dahi vech-i muharrer üzere iştirâ ve tesellüm ve kabûl eyledikden sonra semeni olan meblağ-ı mezbûr bin yedi yüz kırk kıt‘a riyâlî guruşu tamâmen mezbûr Süleyman Beşe yedinden ahz u kabz eyledi ba‘de’l-yevm menzil-i mahdûd-ı merkūm mezbûr Süleyman Beşe’nin mülk-i müşterâsıdır keyfe mâ yeşâ ve yahtâr mutasarrıf olunsun dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fî selhi Şevvâli’l-mükerrem li-sene seb‘a ve sittîn ve elf. Şühûdü’l-hâl: Abdülhalim Efendi b. Ahmed, Muharrem Efendi el-imâm, Seydi Abdülkerim el-imâm, Hasan Halîfe el-müezzin, Şa‘ban Efendi b. Rıdvan, Mustafa Beşe b. Ahmed, Ali Beşe b. ( ) mumcu, Mehmed Ağa b. ( ), Mustafa Beşe b. Mehmed ve gayruhüm mine’l-[hâzırîn.]