Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 329 Hüküm no: 304 Orijinal metin no: [43b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Hacı Ebubekir Ağa’ın küçük çocukları Mehmed Çelebi ve Fâtıma üzerlerine kaynatası Mustafa Ağa b. Ebubekir’in vasi tayin olunduğu Mahmiye-i İstanbul’da Molla Fenarî mahallesinde sâkin olup Ayasofya hamamcısı iken vefât eden el-Hâc Ebîbekir Ağa b. Abdülmennân’ın sulbî sagīr oğlu Mehmed Çelebi ile sulbiye sagīre kızı Fâtıma’nın tesviye-i emrlerine vasiyy-i muhtârları olan Hüseyin Bey b. Abdullah’ın umûr-ı vesâyet-i merkūmede tekâsül ve ihmâli olmağla savb-ı şer‘-i hatîr-i lâzimü’t-tevkīrden muhâsebesi görüldükde hiyâneti olduğu zâhir ve müte‘ayyin olmağın sagīrân-ı mezbûrânın mallarını sıyânet için vasiyy-i merkūme vasiyy-i âhar zam olunmak lâzım gelmekle müteveffâ-yı mezbûrun kayınatası olup vasiyy-i merkūm Hüseyin Bey üzerine hasbî nâzır ta‘yîn ve ihtiyâr ettiği bâ‘isü hâze’l-kitâb umdetü’l-emâsil Mustafa Ağa b. Ebîbekir vesâyet-i merkūmeye ehil olup emânet ve sadâkat ile meşhûr ve müte‘ârif olduğundan mâ‘adâ sagīrân-ı mezbûrâna merkūm Mustafa Ağa zamm-ı vasî olunması her vechile enfa‘ idiği mütebeyyin ve mütehakkık olduğu ecilden işbu kitâb-ı sıhhat-nisâbın a‘lâsını tevkī‘-i şerîf-i müstetâbları ile muvakkı‘ olan âlim-i âmil-i rabbânî fâzıl-ı nihrîr-i samedânî hazretleri merkūm Mustafa Ağa’yı cemî‘ umûr-ı vesâyet-i mezkûrede vasiyy-i mezbûr Hüseyin Bey’e zamm ve ta‘yîn buyurduklarında merkūm Mustafa Ağa dahi kabûl ve hizmet-i lâzımesin edâya müte‘ahhid olmağın mâ-hüve’l-vâki‘ bi’t-taleb ketb ve imlâ olunup merkūm Mustafa Ağa yedine def‘ ve i‘tâ olundu cerâ zâlike ve hurrire. Fi’l-yevmi’l-hâdî ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mefharül-akrân Ahmed Ağa kethüdâ-i hammâmcıyân hâlâ, el-Hâc ömer Ağa hamamcı-i Çinili, el-Hâc Ali b. Abdülmennân hammâmî-i Piyale Paşa, Halil Ağa hamamcı-i Mehmed Paşa der-Galata, el-Hâc Ali Çelebi hamamcı-i Ayasofya sâbıkā, el-Hâc Hüseyin Bey hamamcı Hacı ….?.