Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 331 Hüküm no: 307 Orijinal metin no: [43b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Kirakos v. Şeker’in ticari ortağı Manuk v. Zarak’ta olan alacağının varisleri tarafından tahsil edilip zimmetinin ibra edildiği Medîne-i Galata’da Sultân Bayezid mahallesinde sâkin iken hâlik olan Kirakos v. Şeker nâm Ermeni’nin verâseti zevce-i metrûkesi Serhoke bt. Asvador nâm Ermeniye ile sulbî kebîr oğlu Toros nâm Ermeni’ye münhasıra oldukdan sonra mezkûrân Serhoke ve Toros taraflarından husûs-ı âti’l-beyânı ikrâra vekîller olup medîne-i mezkûre hâricinde kasaba-i Fındıklı’da ekmekçi tâifesinden Mıgırdiç v. Avanos ve medîne-i mezkûrede Azebkapısı kurbünde tâife-i mezbûreden Agop v. Dilek nâm Ermeniler şehâdetleriyle vekâleti sâbite olan Bedros v. Timur nâm Ermeni meclis-i şer‘-i hatîr-i lâzimü’t-tevkīrde hâlik-i mezbûrun zikrolunan [44a] Sultân Bayezid mahallesinde vâki‘ Hasan Ağa kurbünde ve medîne-i mezkûre hâricinde Hendekbaşı kurbünde vâki‘ fırında ekmekçilik san‘atında iştirâk-i seviyy üzere şerîki olan işbu râfi‘ü’l-kitâb Manuk v. Zarak Ermeni mahzarında bi’l-vekâle ikrâr ve i‘tirâf edip hâlik-i mezbûr Kirakos mezbûr Manuk ile fesh-i şirket etmedin hâlik-i mezbûr şirketden mezbûr Manuk yedinde yüz altmış bin akçe ile mecmû‘unun kıymeti kırk bin akçeye müsâvî sekiz re’s değirmen bârgiri kalmışidi hâlâ müvekkilân-ı mezkûrân Serhoke ve Toros mûrisleri hâlik-i mezbûrun mâl-ı şirket-i mezkûreden nısfı olan seksen bin akçeyi zikrolunan bârgirlerin semeni olan kırk bin akçenin nısfı olan yirmi bin akçe ki cem‘an yüz bin akçe haklarını mezbûr Manuk yedinden bi’t-tamâm ahz u kabz eylediler ba‘de’l-yevm mâl-ı şirketden ve zikrolunan bârgirler semeninden mezbûr Manuk yedinde bir akçe ve bir habbe hakkımız bâkī kalmadı dedikde vekîl-i mezbûr Bedros’u vech-i muharrer üzere cârî ve sâdır olan ikrârında el-mukarru lehü’l-mezkûr vicâhen tasdîk ve şifâhen tahkīk edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Osman Beşe çukadâr, İsa Bey b. Ahmed, el-Hâc Ca‘fer b. Abdullah, Yusuf b. Abdullah, Mehmed Çelebi b. Haydar ve gayruhüm mine’l-[hâzırîn.]