Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 331 Hüküm no: 308 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi b. Salih’in arsası vakıf mülk menzilini Terekeci Mehmed Ağa b. Yusuf’a satıp arsasının kullanım hakkını da mütevellisinin izniyle devrettiği Mahmiye-i İstanbul’da Gül Câmi‘i kurbünde Kâtib Hüsrev mahallesi ahâlîsinden Ahmed Çelebi b. Salih meclis-i şer‘-i hatîr-i lâzimü’t-tevkīrde işbu kitâb-ı sıhhat-nisâbın sâhibi fahrü’l-akrân Terekeci Mehmed Ağa b. Yusuf tarafından ikrâr-ı âti’l-beyânı tasdîka vekîl olup mahalle-i mezbûre ahâlîsinden es-Seyyid Abdullah Çelebi b. es-Seyyid Emrullah ve Salih Efendi b. Mehmed şehâdetleri ile vekâleti sâbite olan Hecîn Mehmed Ağa b. Hasan mahzarında tav‘an ikrâr ve i‘tirâf edip zikri âtî akdin sudûruna değin silk-i mülkümde muntazam yedimde mülk ve hakkım olup mahalle-i mezbûrede vâki‘ bir tarafdan bazen Yusuf Ağa b. Abdullah mülküne ve bazen es-Seyyid Mehmed Efendi mülküne ve bir tarafdan Kurd Çavuş b. Abdullah mülküne ve bir tarafdan müvekkil-i mûmâ-ileyh Mehmed Ağa mülküne ve bir tarafdan tarîk-ı âmma müntehî üç bâb fevkānî ve iki bâb tahtânî beş bâb odaları ve cüneyneyi ve bi’r-i mâyı ve kenîfi müştemil olup arsasının senede merhume Sanavber Hâtun Vakfı’na beş yüz kırk akçe mukāta‘ası olan cemî‘ mülk menzilimi kâffe-i hukūk ve merâfıkıyla mûmâ-ileyh Terekeci Mehmed Ağa’ya bin iki yüz elli riyâlî guruşa bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i meşrûh üzere iştirâ ve tesellüm eyledikden sonra semeni olan meblağ-ı mezkûr bin iki yüz elli guruşu müvekkil-i mûmâ-ileyh Terekeci Mehmed Ağa yedinden bi’t-tamâm ahz u kabz eylediğimden sonra arsa-i menzil-i mezkûru ma‘rifet-i mütevellî-i vakf-ı mezkûr ile müvekkil-i mûmâ-ileyh Terekeci Mehmed Ağa’ya ferâğ ve tefvîz edip ol dahi tefevvüz ve kabûl eyledi ba‘de’l-yevm ebniye-i menzil-i mezkûr müvekkil-i mûmâ-ileyh Mehmed Ağa’nın mülk-i müşterâsı ve arsa-i mezkûre hakk-ı müfevvazıdır keyfe mâ yeşâ ve yahtâr mutasarrıf olsun dedikde mukırr-ı mezbûr Ahmed Çelebi’yi vech-i muharrer üzere cârî ve sâdır olan ikrârında vekîl-i mezkûr Hecin Mehmed Ağa vicâhen tasdîk ve şifâhen tahkīk edicek mâ-hüve’l-vâki‘ bi’t-taleb ketb olundu. Tahrîren fî selhi Şevvâli’l-mükerrem li-sene seb‘a ve sittîn ve elf. Şühûdü’l-hâl: Yusuf Efendi el-imâm, Mehmed Çelebi b. Mustafa, Hüseyin Bey b. Mehmed el-cündi, Mehmed Ağa b. Hüseyin, Kiremidçi Mustafa Çelebi, Kasım Çelebi matlabî, Abdullah Çelebi b. Abdullah, Salih Efendi el-kâtib ve gayruhüm mine’l-[hâzırîn.]