Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 341 Hüküm no: 322 Orijinal metin no: [45b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Badracık Metropolidi Tanaş v. Andoni’nin Hacı İbrahim Bey b. İsmail’e yedi yüz guruş borcu olduğunu ikrar ettiği Vilâyet-i Rumeli’nde bi’l-fi‘il nefs-i Badracık metropolidi olan Tanaş v. Andoni nâm râhib meclis-i şer‘-i hatîr-i lâzimü’t-[tevkīrde] mahmiye-i İstanbul’da merhûm ve mağfûrun-leh Sultân Süleyman Hân aleyhi’r-rahmetü ve’l-gufrân câmi‘-i şerîfi kurbünde sâkin işbu bâ‘isü’l-kitâb el-Hâc İbrahim Bey b. İsmail mahzarında tav‘an ikrâr ve i‘tirâf edip mezbûr el-Hâc İbrahim Bey’e yedinden müşterâ ve makbûz semenlerinin üç yüz elli kıt‘a riyâlî guruşu târih-i kitâbdan yüz seksen gûn tamâmına ve üç yüz elli kıt‘a riyâlî guruşu bir sene tamâmına değin müeccel ve mev‘ûd biri iki ayaklı ve biri üç ayaklı herbirinin ortalarında birer zümrüd taşlı bir çift altın küpe semenlerinden cem‘an yedi yüz kıt‘a riyâlî guruş zimmetimde lâzimü’l-edâ ve vâcibü’l-kazâ deynim vardır dedikde mukırr-ı mezbûru ikrâr-ı meşrûhunda el-mukarru lehü’l-mezbûr el-Hâc İbrahim Bey vicâhen tasdîk ve şifâhen tahkīk ettikden sonra mahrûse-i Galata kazâsına tâbi‘ Tatavla nâm karyede sâkin Duka v. Panayot nâm zimmî meblağ-ı müeccel-i mezbûr yedi yüz kıt‘a riyâlî guruşa ben mukırr-ı mezbûr Tanaş’ın emriyle kefîl oldum dedikde mâ-hüve’l-vâki‘ bi’t-taleb ketb olundu. Fi’l-yevmi’s-sânî min-Zilka‘deti’ş-şerîfe li-sene seb‘a ve sittîn ve elf. Şühûdü’l-hâl: İbrahim Bey b. Ali el-bevvâbü’s-sultânî, Halil Bey b. Mustafa el-bevvâbü’s-sultânî, Mustafa Beşe b. Numan er-râcil, Osman Beşe bin Receb er-râcil, Mustafa b. Mehmed, Abdurrahman Çelebi el-cündi ve gayruhüm mine’l-[hâzırîn.]