Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 342 Hüküm no: 323 Orijinal metin no: [45b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Ağa b. Abdülmennan’ın on dört bin akçe alacağı olduğu iddiasıyla Ahmed Ağa b. Bali aleyhine açtığı davada beş bin akçe üzerine sulh olduğu Mahmiye-i İstanbul’da Şehremini kurbünde sâkin Yusuf Ağa b. Abdülmennân tarafından husûs-ı âti’l-beyânı ikrâra vekîl olup Mehmed Bey b. Ali ve Hüseyin b. Mehmed şehâdetleri ile şer‘an vekâleti sâbite olan Mehmed Ağa b. Ali meclis-i şer‘-i hatîr-i lâzimü’t-tevkīrde sâbıkā kasablar kethüdâsı olan işbu râfi‘ü’l-kitâb Ahmed Ağa b. Bâli mahzarında bi’l-vekâle tav‘an ikrâr ve i‘tirâf edip müvekkilim mezbûr Yusuf Ağa’nın merkūm Ahmed Ağa zimmetinde her re’si yüzer akçeden müşterâ ve makbûz dört yüz re’s koyun semeninden kırk bin fıddî râyic fi’l-vakt akçe hakkı olup meblağ-ı mezbûrun yirmi altı bin akçesini müvekkilim mezbûr Yusuf Ağa merkūm Ahmed Ağa yedinden ahz u kabz edip mâ‘adâsı olan on dört bin akçeyi da‘vâ ve taleb etmekle beynlerinde münâza‘ât-ı kesîre vukū‘undan sonra beynlerine muslihûn tavassut edip zikrolunan on dört bin akçe da‘vâsından müvekkilim mezbûr Yusuf Ağa’yı merkūm Ahmed Ağa ile beş bin akçe üzerine sulh ettiklerinde ol dahi sulh-ı mezkûru kabûl edip bedel-i sulh olan beş bin akçeyi merkūm Ahmed Ağa yedinden tamâmen ahz u kabz eyledi ba‘de’l-yevm zikrolunan on dört bin akçeye müte‘allika mezbûr Ahmed Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledi dedikde vekîl-i mezbûr Mehmed’in vech-i muharrer üzere cârî ve sâdır olan ikrârında el-mukarru lehü’l-mezkûr Ahmed Ağa vicâhen tasdîk ve şifâhen tahkīk etdikde mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sânî min-Zilka‘deti’ş-şerîfe li-sene seb‘a ve sittîn ve elf. Şühûdü’l-hâl: Hüseyin Çavuş b. Mehmed el-mübâşir, Mehmed Bey b. Ali, Ahmed Dede b. Mehmed, Ramazan b. Abdullah ve gayruhüm mine’l-[hâzırîn.]