Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 342 Hüküm no: 324 Orijinal metin no: [45b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Hüseyin’e Cafer Ağa b. Ahmed’e olan borcunu ödediğini ispat etmesi için süre verildiği Mahmiye-i İstanbul’da Kâtib Şemseddin mahallesinde sâkin bâ‘isü’r-rakīm Ca‘fer Ağa b. Ahmed nâm [kimesne] meclis-i şer‘-i hatîr-i lâzimü’t-tevkīrde Mehmed Çelebi b. Hüseyin mahzarında da‘vâ ve takrîr-i kelâm edip mezbûr Mehmed Çelebi[’ye] târih-i kitâbdan bir buçuk ay mukaddem malımdan elli beş bin akçe ikrâz ve teslîm ol dahi yedimden iktirâz ve kabz eyleyip hâlâ taleb eylediğimde meblağ-ı mezbûru bana edâda te‘allül etmeğin suâl olunup alıverilmesi matlûbumdur dedikde gıbbe’s-suâl mezbûr Mehmed Çelebi cevâbında fi’l-vâki‘ müdde‘î-i mezbûr Ca‘fer Ağa yedinden vech-i muharrer üzere târih-i mezbûrda meblağ-ı mezbûr elli beş bin akçe iktirâz ve kabz eylemişidim deyu ikrâr edip lâkin meblağ-ı mezbûr elli beş bin akçeyi tamâmen yine kendiye edâ ve teslîm edip zimmetimde müdde‘î-i mezbûra deynim kalmamışdır deyu def‘le mukābile edicek akībe’l-istintâk ve’l-inkâr mezbûr Mehmed Çelebi’den def‘-i mezbûrunu mübeyyine beyyine taleb olundukda ityân-ı beyyine için istimhâl etmeğin mehl-i şer‘î ile imhâl olundu mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mustafa Çavuş el-mübâşir, Hâcı Ca‘fer b. Mustafa, Hâcı Osman, Mehmed Çelebi b. Haydar, Osman Beşe çukadâr, İsa Bey b. Ahmed ve gayruhüm.