Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 350 Hüküm no: 334 Orijinal metin no: [47a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mehmed’in merhum Ahmed Odabaşı’nın terekesi hususunda diğer varisler Ahmed Çelebi ve Rahime’nin zimmetini ibra ettiği Mahmiye-i İstanbul’da Canbaziye mahallesi ahâlîsinden iken bundan akdem Babadağı’nda vefât eden Ahmed Odabaşı b. Mehmed’in verâseti li-ebeveyn hâli Mustafa’nın sulbî oğlu Ahmed Çelebi ile sulbiye kızı Rahime nâm hâtuna ve li-ebeveyn ammesi kızı Hadice Hâtun bt. Mehmed Efendi’ye münhasıra olduğu ve tereke-i müteveffâ-yı mezbûr dokuz sehm i‘tibâr olunup sihâm-ı merkūmeden iki sehmi merkūm Ahmed Çelebi’ye ve bir sehmi merkūme Rahime Hâtun’a ve altı sehmi merkūme Hadice Hâtun’a isâbet ettiği şer‘an mütehakkık oldukdan sonra merkūme Hadice Hâtun’un zevci ve tarafından husûs-ı âti’l-beyânı ikrâra vekîli olup Mahmud Efendi b. Mustafa ve Mehmed Çavuş b. Hasib şehâdetleri ile şer‘an vekâleti sâbite olan Hasan Efendi b. Yahya meclis-i şer‘-i hatîr-i lâzimü’t-tevkīrde kendi tarafından asîl ve karındaşı merkūme Rahime Hâtun’un ikrâr-ı âti’z-zikri tasdîka vekîl-i şer‘îsi olup müteveffâ-yı mezbûrun muhallefâtına vâzı‘u’l-yed olan işbu bâ‘isü’l-kitâb mezbûr Ahmed Çelebi mahzarında bi’l-vekâle tav‘an ikrâr ve i‘tirâf edip müvekkilem mezbûre Râbia Hâtun müteveffâ-yı mezbûr Ahmed Odabaşı’nın terekesinden mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd menzilinden mâ‘adâ ber-mûceb-i defter-i kassâm-ı askerî akār ve nukūd cem‘an iki yüz yetmiş bin akçe terekesinden sülüsân hisse-i şer‘iyyesine isâbet eden yüz seksen bin akçe hakkını mezbûr Ahmed Çelebi yedinden tamâmen ahz u kabz edip müteveffâ-yı mezbûrun terekesine müte‘allika cemî‘ de‘âvî ve mutâlebât ve eymân ve muhâsamâtdan berî olup merkūm Ahmed Çelebi’nin ve karındaşı merkūme Rahime Hâtun’un zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledi min ba‘d müvekkilem mezbûre Hadice Hâtun’un merkūm Ahmed Çelebi ve mersûme Rahime Hâtun üzerlerine müteveffâ-yı mezbûr Ahmed Odabaşı’nın terekesine müte‘allika bi-vechin mine’l-vücûh ve sebebin mine’l-esbâb da‘vâsı kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fî gurreti Zilka‘deti’ş-şerîfe li-sene seb‘a ve sittîn ve elf. Şühûdü’l-hâl: Ahmed Ağa b. Mehmed, Mehmed b. Ali, Hasan Çelebi b. Oğuzlu, Mustafa Çelebi b. Mehmed, Mehmed Çavuş b. Hasib, Mehmed Çelebi b. Hasan, Mustafa b. Abdullah, Ahmed Efendi b. Mehmed, Hüseyinb. Latif ve gayruhüm mine’l-[hâzırîn.]