Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 351 Hüküm no: 336 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kerpiniş kasabasında oturan bakkallardan bazılarının kendilerinden haksız yere para aldığını iddia ettikleri Receb Beşe b. Abdullah ile bin akçe üzerine sulh oldukları Vilâyet-i Rumeli’nde nefs-i kasaba-i Kerpiniş’de sâkin olup bakkal tâifesinden Yorgi v. Nikola ve Franko v. Yorgi ve [diğer] Yorgi v. Nikola ve Yani v. Komeno nâm zimmîler meclis-i şer‘-i hatîr-i lâzimü’t-tevkīrde Dergâh-ı âlî yeniçerilerinden işbu bâ‘isü’l-vesîka Receb Beşe b. Abdullah nâm râcil mahzarında herbiri ikrâr ve i‘tirâf [edip] mezbûr Receb Beşe kasaba-i mezbûre ahâlîsinden olmağla târih-i kitâbdan sekiz ay mukaddem bizden bi-gayri vech-i şer‘î on bin akçemizi ahz u kabz etmeğin hâlâ meblağ-ı mezbûru merkūm Receb Beşe’den da‘vâ ve taleb eylediğimizde beynimizde münâza‘ât-ı kesîre ve muhâsamât-ı şedîde vâkı‘a olmuşidi el-hâletü hâzihî tavassut-ı Müslimîn-i muslihîn ile mezbûr Receb Beşe bizi da‘vâ-yı mezbûreden bin fıddî râyic fi’l-vakt akçe üzerine inşâ-i akd-i sulh eyledikde biz dahi sulh-ı mezbûru kabûl ve bedel-i sulh olan meblağ-ı mezbûr altı bin akçeyi tamâmen mezbûr Receb Beşe yedinden ahz u kabz edip mâ‘adâ da‘vâsından zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik min ba‘d mezbûr Receb Beşe kıbelinde hak ve alâkamız kalmadı dediklerinde mezbûr Receb benim dahi mezbûrûn kıbellerinden vechen mine’l-vücûh ve sebeben mine’l-esbâb hak ve alâkam olmayıp hukūk-ı ma‘lûme ve mechûleye müte‘allika cemî‘ de‘âvîden mezbûrûnu ibrâ ve ıskāt eyledim dedikde gıbbe’t-tesâdukı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sânî min-Zilka‘deti’ş-şerîfe li-sene seb‘a ve sittîn ve elf. Şühûdü’l-hâl: Mustafa Beşe b. Abdullah, Yusuf b. ( ) za‘îm-i Kerpiniş, Mehmed Beşe b. Mustafa, Mehmed b. Kadri, Mustafa Beşe b. Abdullah, İsa Bey b. Ahmed, İsmail b. Yunus ve gayruhüm mine’l-[hâzırîn.]