Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 352 Hüküm no: 337 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Belkıs bt. Abdullah’ın merhume Sakine bt. Derviş tarafından cariyelikten azat edilen hür bir kadın olduğunu ispat ettiği Mahmiye-i İstanbul’da Murad Paşa-yı atîk mahallesinde sâkine Belkıs bt. Abdullah nâm hâtun meclis-i şer‘-i hatîr-i lâzimü’t-tevkīrde mahalle-i mezbûrede sâkine iken bundan akdem vefât eden Sâkine bt. Derviş Mehmed’in sadriye kebîre kızı Fâtıma nâm hâtun mahzarında üzerine da‘vâ ve takrîr-i kelâm edip ben müteveffât-ı mezbûrenin câriye-i memlûkesi olduğum hâlde bin yetmiş dört altmış dört senesi şehr-i Rebî‘ülâhiri gurresinde beni enti hürretün minnî kable mevtî bi-erba‘în yevmen kaydı ile mukayyed tedbîr-i sahîh-i şer‘î ile müdebbere edip vech-i muharrer üzere tedbîrini târih-i mezbûrda mahmiye-i mezbûrede Davud Paşa Mahkemesi’nde hilâfeten müvellâ olan İbrahim Efendi b. Hürrem huzûrunda ikrâr edip mevlânâ-yı mezbûr tahrîr ve yedime işbu hüccet-i şer‘iyyeyi vermişiken mezbûre Fâtıma Hâtun bana müteveffât-ı mezbûrenin mülk-i rakīki olmak üzere vaz‘-ı yed murâd eder suâl olunup sebîlim tahliye olunmak matlûbumdur deyu târih-i mezbûr ile müverraha ve mevlânâ-yı mûmâ-ileyhin hat ve hatemini hâviye ve mazmûnu min külli’l-vücûh takrîr-i meşrûhunu nâtıka hüccet-i şer‘iyye ibrâz edip mezbûre Fâtıma muvâcehesinde feth ve kırâat ve istintâk olundukda mazmûn-ı hüccet-i merkūmeyi tâyi‘aten ikrâr ve i‘tirâf etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Hüseyin Çavuş b. Ali el-mübâşir, Mustafa Efendi b. Muharrem el-kâtib, Osman Beşe çukadâr, İsa Bey b. Ahmed ve gayruhüm mine’l-[hâzırîn.]