Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 373 Hüküm no: 358 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mağribli merhum Enserci Mansur b. Abdülaziz’in Abdülaziz b. Süleyman’da olan alacağındaki kendi hissesini tahsil etmek üzere kardeşi Bahrun’un Hacı Âmir b. Mehmed’i vekil tayin ettiği Fi’l-asl diyâr-ı Mağrib’de Cerbe kazâsına [tâbi‘] Deşni nâm karyeden olup bundan akdem mahmiye-i İstanbul’da Parmakkapısı kurbünde enserci tâifesinden iken vefât eden Mansur b. Abdülaziz’in verâseti li-ebeveyn karındaşı Bahrun ile kız karındaşı Hadice’ye münhasıra oldukdan sonra mezbûr Bahrun tarafından karındaşı müteveffâ-yı mezbûr Mansur’dan irs-i şer‘le intikāl eden hisse-i şer‘iyyesini da‘vâ ve taleb ve ahz u kabza vekâlet iddiâ eden el-Hâc Âmir b. Mehmed meclis-i şer‘-i hatîr-i lâzimü’t-tevkīrde tâife-i mezbûreden olup zikrolunan Parmakkapı kurbünde sâkin Abdülaziz b. Süleyman mahzarında bi’l-vekâle üzerine takrîr-i da‘vâ edip müvekkilim mezbûr Bahrun’un mûrisi müteveffâ-yı mezbûr Mansur hâl-i hayâtında kendi malından yirmi iki bin fıddî râyic fi’l-vakt akçesini mezbûr Abdülaziz yedine alâ tarîkı’l-vedî‘a vaz‘ ve teslîm edip ol dahi yedinen ahz u kabz edip kable’t-teslîm müteveffâ olmağla meblağ-ı mezbûr yedinde kalmışidi hâlâ müvekkilim mezbûr Bahrun’a meblağ-ı mezkûrdan irs-i şer‘le intikāl eden hisse-i şer‘iyyesini mezbûr Abdülaziz’den vekâletim hasebiyle taleb ederim suâl olunsun dedikde gıbbe’s-suâl mezbûr Abdülaziz cevâbında müteveffâ-yı mezkûr Bahrun’dan hâl-i hayâtında vech-i muharrer üzere yirmi iki bin akçeyi ahz u kabzını ikrâr ve minvâl-i meşrûh üzere tarafından vekîl olduğunu inkâr edicek müdde‘î-i mezbûr el-Hâc Âmir’den müdde‘âsını mübeyyine beyyine taleb olundukda fi’l-asl zikrolunan Cerbe kasabası ahâlîsinden olup mahmiye-i İstanbul’da Tahtakale kurbünde enserci tâifesinden Sa‘d b. Merzuk ve Mesud b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ mezbûr Bahrun karındaşı müteveffâ-yı mezbûrun hâl-i hayâtında mezbûr Abdülaziz yedine vedî‘a tarîki üzere vaz‘ ve teslîm eylediği yirmi iki bin akçeden irs-i şer‘le intikāl [eden] hakkını da‘vâ ve taleb ve ahz u kabza mezbûr el-Hâc Âmir’i bizim huzûrumuzda vekîl ve menâbına nâib nasb ü ta‘yîn eyledi biz bu husûsa şâhidleriz ve şehâdet ederiz edyu herbiri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın şehâdetleri mûcebince meblağ-ı mezbûrdan müvekkil-i mezbûr Bahrun’un hissesini vekîl-i mezbûra teslîme mezbûr Abdülaziz’e tenbîh birle mâ-vaka‘a kayd şüd. Fî 24 min-Şevvâl sene [10]67. Şühûdü’l-hâl: Ahmed Çavuş b. Ali el-mübâşir, İsa Bey b. Ahmed, el-Hâc Ca‘fer b. Abdullah, Osman Beşe çukadâr ve gayruhüm mine’l-[hâzırîn.]