Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 376 Hüküm no: 362 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Süleyman’ın mudarabe suretiyle ticari ortaklık ettiği Yusuf Bey b. Abdullah ile aralarında anlaşmazlık çıktığı Mahmiye-i İstanbul’da vâki‘ Dergâh-ı âlî yeniçerileri odalarından Yeni odalar kurbünde Taşçı Mustafa Bey mahallesinde sâkin Mustafa Çelebi b. Süleyman meclis-i şer‘-i hatîrde mahmiye-i mezbûrede Küçükpazar’da Hacıkadın Hamamı kurbünde sâkin olup Bostancı Sağır Solak demekle şehîr olan Yusuf Bey b. Abdullah mahzarında üzerine takrîr-i da‘vâ edip merkūm Yusuf Bey yedinden ve malından ticâret edip hâsıl olan ribh beynimizde nısf olmak üzere mudârebe-i mutlaka ile yetmiş bin yedi yüz elli akçeyi ahz u kabz ettiğimden sonra Vilâyet-i Rumeli’nde Nevrekop kazâsında vâki‘ Teşova ve Tares nâm karyelere varıp mâl-ı mezbûr ile pencere demirleri ve saç ayak ve kebab şişleri iştirâ ve kabz eylediğimden sonra eşyâ-i mezkûreden kezâlik kendi malım ile on beş bin akçelik metâ‘ dahi iştirâ ve kabz ve beldemizde halt müte‘ârif değil iken mezbûr Yusuf Bey’in izninsiz mâlım [ile] iştirâ ettiğim metâ‘-ı mezkûru mâl-ı mudârebe ile iştirâ ettiğim metâ‘a halta ve cümlesini bilâ-beyân mezbûr Yusuf Bey’e irsâl ve îsâl ettiğimde mezbûr dahi ba‘de’l-kabz metâ‘-ı mezbûrun navl ve gümrüğüne emrim ile malından yedi bin yüz elli akçe sarfından sonra cümle metâ‘ı yüz on altı bin seksen beş akçeye bey‘ ve semen-i merkūmu tamâmen kabz eylemişdir lâkin malım ile iştirâ edip halt ile temyîzi mümkün olmayan metâ‘ı mâl-ı mudârabe ile iştirâ olunan metâ‘a rabb-i mâlin izninsiz haltım ile mudârebe-i mezkûre fâside olmağın emti‘a-i mezkûrenin hîn-i haltımda olan kıymeti iştirâ ettiğim semene müsâvî olduğu ecilden makbûzu olan semen-i mezkûrdan yetmiş bin yedi yüz elli akçe mâl-ı mudârebe ile masrûfu olan yedi bin yüz elli akçesin alıkoyup mâ‘adâyı bana teslîm eylemesin taleb ederim suâl olunsun deyu hâlâ şeyhülislâm müftî’l-enâm keşşâfü’l-müşkilâti’d-dîniyye hallâlü’l-mu‘dilâti’l-yakīniyye hazretlerinin imzâ-i şerîfleri ile mümzâ fetvâ-yı şerîfe ibrâz eyledikde feth ve mezkûr Yusuf Bey muvâcehesinde kırâat olundukda mazmûn-ı münîfinde “halt müte‘ârif olmayan bir belde ahâlîsinden Zeyd Amr’a mudârebe-i mutlaka ile şu kadar akçe verip Amr dahi alıp âhar diyâra gidip meblağ-ı mezbûr ile metâ‘ aldıkda kendi malı ile iştirâ edip halt ile temyîzi mümkün olmayan metâ‘ı Zeyd’in izninsiz mâl-ı mudârebe ile alınan metâ‘a halt edip ba‘dehû cümlesin Zeyd gönderip Zeyd dahi cümlesini bey‘ edip ve nakd-i semen eyledikde hâlâ Amr gelip hîn-i haltda olan kıymetini iştirâ ettiği semene müsâvî olmağla Zeyd’e dâmin olup hâsıl olan cümle fâideyi Zeyd’den almak istedikde Zeyd râzı olmayıp alâ mâ-şarten beynimizde iktisâm edelim demeğe kādir olur mu deyu istiftâ olundukda cevâb-ı bâ-savâblarında olmaz” deyu buyurulmağla merkūm Yusuf Bey’den suâl olundukda cevâbında müdde‘î-i merkūmu cemî‘ kelimât-ı meşrûhasında tasdîk ve hâl minvâl-i meşrûh üzere olduğunu tav‘an ikrâr ve i‘tirâf edicek mûcibiyle ba‘de’l-hükm mâ-hüve’l-vâki‘ bi’t-taleb ketb olundu. Fi’l-yevmi’s-sâlis min-Zilka‘deti’ş-şerîfe li-sene seb‘a ve sittîn ve elf. Şühûdü’l-hâl: Umdetü’l-kuzât Mustafa Efendi b. Bâli el-münfasıl an-kazâ’i Tırhala, Umdetü’l-kuzât Meremmetcizâde el-Hâc Derviş Mehmed Efendi, el-Hâc Hüseyin Bey b. Abdullah el-muhzır, İsa Bey b. Ahmed, Mustafa Çelebi b. ( ) el-muhzır, el-Hâc Dilaver b. Abdullah el-muhzır, Kinan Çavuş el-mübâşir.