Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 375 Hüküm no: 361 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Paşa b. Mahmud Paşa’nın Süleyman Efendi’ye beş yüz guruş borcu olduğunu ikrar ettiği Fazîletlü efendi hazretlerinin imzâsıyladır. Mahmiye-i İstanbul’da Aksaray kurbünde Koğacı Dede mahallesinde sâkin işbu kitâbın sâhibi umdetü erbâbi’t-tahrîr ve’l-kalem zübdetü ashâbi’t-tastîr ve’r-rakam Süleyman Efendi b. ( ) dîvân-ı ma‘delet-unvânda ma‘kūd mahfil-i kazâda emîrü’l-ümerâ’i’l-kirâm kebîru’l-küberâ’i’l-fihâm Mehmed Paşa b. Mahmud Paşa mahzarında üzerine takrîr-i da‘vâ edip mezbûr Mehmed Paşa’nın cihet-i deyn-i şer‘îden işbu hâzır bi’l-meclis Mehmed Bey’e beş yüz kıt‘a riyâlî guruş deyni olmağla mezbûru üçümüz bir meclisde iken benden havâle-i sahîha-i şer‘iyye ile havâle edip ben dahi havâle-i mezbûreyi kabûl ve meblağ-ı mezbûr beş yüz riyâlî guruşu mezbûr Mehmed Bey’e kendi malımdan tamâmen îfâ ve teslîm etmekle mezbûr Mehmed Paşa’ya mürâcaat edip meblağ-ı mezbûru mezkûr Mehmed Paşa’dan alıverilmesin taleb ederin suâl olunsun dedikde gıbbe’s-suâl mezbûr Mehmed Paşa cevâbında kaziyye vech-i muharrer üzere olduğunu bi-tav‘ihî mu‘terif meblağ-ı mezbûr müdde‘î-i merkūma vech-i meşrûh üzere zimmetinde deyni olduğunu mukır olmağın alâ mûcibi i‘tirâfihî meblağ-ı mezbûr beş yüz kıt‘a riyâlî guruşu mezbûr Süleyman Efendi’ye îfâ ve edâya mezbûr Mehmed Paşa’ya tenbîh olunup mâ-vaka‘a bi’t-taleb ketb olundu. Fî evâhiri Şevvâli’l-mükerrem li-sene seb‘a ve sittîn ve elf. Şühûdü’l-hâl: İbrahim Çavuş el-mübâşir, İvaz Ağa b. Hüseyin, Ahmed Bey b. Abdurrahman, el-Hâc Dilaver b. Abdullah ve gayruhüm mine’l-[hâzırîn.]