Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 476 Hüküm no: 483 Orijinal metin no: [70b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Hüseyin Ağa b. Mustafa’nın ev satışından Fatma ve Sâliha’nın vasisi Mahmud Halîfe’de otuz guruş alacağı olduğu Mahmiye-i İstanbul’da Molla Gürânî mahallesinde sâkin işbu bâ‘isü’r-rakīm Hâcı Hüseyin Ağa b. Mustafa meclis-i şer‘-i hatîrde mahmiye-i mezbûrede Kiçi Hâtun mahallesi sükkânından iken vefât eden Ali Ağa’nın sulbî sagīr oğlu Ahmed ve sulbiye sagīre kızı Fâtıma’nın tesviye-i umûrlarına kıbel-i şer‘den mansûb vasîleri olan Mahmud Halîfe b. İbrahim mahzarında üzerine da‘vâ ve takrîr-i kelâm edip mahmiye-i mezbûrede zikrolunan Molla Gürânî mahallesinde vâki‘ bir tarafı Sarı Solak mülküne ve bir tarafı sipâhî çavuşlarından Mustafa Çavuş mülküne ve bir tarafı merhûm Bayram Paşa odalarına ve bir tarafı tarîk-ı amma müntehî dâhilen ve hâricen büyût-ı adîdeyi müştemil mülk menzil Bağdad ağası iken bundan akdem vefât eden Ahmed Ağa’nın ile’l-vefât mülkü olup ba‘de vefâtihî verâseti zevceteyn-i metrûketeyni Fâtıma Hâtun bt. İbrahim ile Sâliha Hâtun bt. Abdullah’a ve li-ebeveyn karındaşı kızı Âişe nâm sagīreye münhasıra olmağla mezbûrâta isâbet ve intikāl eyledikden sonra mezbûretân Fâtıma ve Sâliha menzil-i mezbûrda olan hisse-i şer‘iyyelerini bana iki bin sekiz yüz kıt‘a riyâlî guruşa bâtten bey‘ ve teslîm ben dahi ba‘de’l-iştirâ ve’t-tesellüm semen-i mezbûrdan merkūme Fâtıma zimmetimde hakkı olan bin dört yüz guruşun yüz otuz riyâlî guruşunu vasiyy-i mezbûr ile üçümüz bir meclisde iken benden vasî deyni mukābilesinde mezbûra havâle-i sahîha-i şer‘iyye ile havâle ben dahi ba‘de’l-kabûl meblağ-ı muhâllün-bih olan meblağ-ı mezbûr yüz otuz guruşun otuz guruşunu vasiyy-i mezbûr Mahmud Halîfe’ye edâ ve teslîm eylediğimden sonra sagīre-i mezbûre Âişe vefât eyledikde veresesi benden menzil-i mezbûru müteveffâ-yı mezbûr Ahmed Ağa hâl-i hayâtında sagīre-i mezbûre Âişe’ye hibe ve temlîk ve mezbûre Âişe’nin hayâtında vasîsi olan Yusuf Ağa nâm kimesneye teslîm ol dahi ittihâb ve kabz etmeşidi deyu da‘vâ ben dahi ba‘de’l-inkâr vech-i şer‘î üzere müdde‘âlarını huzûr-ı hâkimü’ş-şer‘de benim muvâcehemde isbât eylediklerinden sonra menzil-i mezbûr yedimden nizâ‘ olunup [71a] kasr-ı yedime taraf-ı şer‘den tenbîh olunmuşidi hâlâ semen-i mezbûrdan merkūme Fâtıma havâle etmekle vasiyy-i mezbûra verdiğim meblağ-ı mezbûr otuz riyâlî guruşu vasiyy-i mezbûr Mahmud Halîfe’den taleb ederim suâl olunsun dedikde gıbbe’s-suâl mezbûr Mahmud Halîfe cevâbında fi’l-hakīka mezbûretân Fâtıma ve Sâliha menzil-i mahdûd-ı mezbûrda olan hisse-i meşrûhalarını müdde‘î-i mezbûra semen-i merkūma bâtten bey‘ ve teslîm eylediklerinden mezbûre Fâtıma Hâtun semen-i mezbûrda olan hissesinden yüz otuz riyâlî guruş deyni mukābilesinde bana ba‘de’l-havâle meblağ-ı muhâlün-bih mezbûran otuz guruşunu mezbûr Hâcı Hüseyin Ağa yedinden ahz u kabz eylediğimden sonra mezbûre Âişe vefât edep veresesi menzil-i mezbûru merkūmdan vech-i muharrer üzere da‘vâ ve kasr-ı yed etdirmişler idi deyu bi-tav‘ihî mu‘terif olmağın mûcibiyle meblağ-ı mezbûr otuz guruşu müdde‘î- i mezbûr Hâcı Hüseyin Ağa’ya edâ ve teslîme mezbûr Mahmud Halîfe’ye tenbîh olunup mâ-vaka‘a bi’t-taleb ketb olundu. Fi’l-yevmi’s-sâlis min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Mustafa Efendi b. Abdurrahman Efendi el-kâtib, Mustafa Efendi b. Muharrem, Osman Beşe çukadâr, İbrahim Bey b. Ömer, İsa Bey b. Ahmed ve gayruhüm.