Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 478 Hüküm no: 484 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed b. Hacı Mustafa’nın Rus asıllı ümm-i veledi Belkıs’ı azat ettiği Dâru’l-hilâfeti’l-aliyye mahmiye-i Kostantıniyye mahallâtından Ca‘fer Subaşı mahallesinde sâkin Hâcı Mehmed b. el-Hâc Mustafa nâm kimesne meclis-i şer‘-i hatîr-i lâzimü’t-tevkīrde tav‘an ikrâr ve i‘tirâf edip zikri âtî ıtkın sudûruna değin silk-i mülk-i sahîhimde münselik olan işbu sâhibü’l-kitâb orta boylu açık kaşlı göğ gözlü Rusiyyetü’l-asl Müslimetü’l-mille ümm-i veledim Belkıs bt. Abdullah nâm câriye-i memlûkemi hasbeten lillâhi’l-aliyyi’l-azîm ve taleben li-merzâti’r-rabbi’r-rahîm tahrîr ve i‘tâk ve sâir harâir-i asliyyât zümresine idrâc ve ilhâk eyledim min ba‘d mezbûre Belkıs sâir harâir-i asliyyât gibi hürre olup üzerinde mevâlî için utekā üzerlerinde olan hakk-ı velâdan gayrı hak ve alâkam kalmadı dedikde mezbûre Belkıs talebiyle mâ-hüve’l-vâki‘ bi’t-taleb ketb olundu. Fi’l-yevmi’s-sâdis min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Mehmed Efendi b. Mehmed el-imâm, Mustafa Hanife b. Mehmed müezzin, Receb b. Musa, Hızır Beşe b. Ahmed, Derviş Mehmed b. İbrahim, Hüseyin Beşe b. Abdullah, Hâcı Ahmed, Ahmed b. Mustafa, Hüseyin Çelebi b. Abdullah, Osman Beşe çukadâr.