Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 478 Hüküm no: 485 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Eyüb Çelebi’nin Mustafa Beşe b. Hacı Mehmed’de olan elli bin guruş alacağının varislerine ödenmesine karar verildiği Mahmiye-i İstanbul’da Gedikpaşa kurbünde Dîvâne Ali mahallesi sükkânından olup bundan akdem vefât eden Eyüb Çelebi b. ( ) verâseti zevce-i metrûkesi Bâdreftâr bt. Abdullah nâm hâtuna ve sulbî sagīr oğulları Halil ve Salih ve sulbiye sagīre kızları Havva ve Sâliha ve sulbiye kebîre kızları Hadice ve Fâtıma ve Âişe’ye münhasıra olduğu şer‘an mütehakkık oldukdan sonra sıgār-ı mezbûrûn Halil ve Salih ve Hadice ve Fatma ve Âişe’nin tesviye-i emrlerine savb-ı şer‘-i nebevîden mansûb vasîleri olan Veli Bey b. el-Hâc Ahmed meclis-i şer‘-i hatîrde mahalle-i mezbûre sükkânından Mustafa Beşe b. el-Hâc Mehmed nâm râcil mahzarında bi’l-vesâye üzerine takrîr-i da‘vâ edip müteveffâ-yı mezbûr Eyüb Çelebi’nin mezbûr Mustafa Beşe zimmetinde cihet-i deyn-i şer‘îden bin elli riyâlî guruş hakkı olup kable’l-istîfa mezbûr Eyüb Çelebi vefât edip meblağ-ı mezbûr bin elli riyâlî guruş irs-i şer‘le veresesi merkūmûna intikāl etmekle meblağ-ı mezbûrdan vasîsi olduğum sıgār-ı mezbûrûnun hisse-i şer‘iyyelerinin mezbûr Mustafa Beşe’den alıverilmesin taleb ederim suâl olunsun dedikde gıbbe’s-suâl mezbûr Mustafa Beşe cevâbında fi’l-hakīka müteveffâ-yı mezbûr Eyüb Çelebi’ye cihet-i deyn-i şer‘îden üzerime edâsı lâzım bin elli riyâlî guruş deynim vardır deyu tav‘an i‘tirâf edicek i‘tirâfı mûcebince meblağ-ı mezbûru verese-i müteveffâ-yı mezbûra edâ ile merkūm Mustafa Beşe üzerine ilzâm olunup mâ-hüve’l-vâki‘ bi’t-taleb ketb olundu. Hurrire fi’l-yevmi’s-sâlis min-Zilhicceti’ş-şerîfe li-sene 1067. Şühûdü’l-hâl: Umdetü’l-müderrisîni’l-kirâm Abdullah Efendi, Ahmed Çelebi b. Abdurrahman, Keşfî Mustafa Efendi, İsa Bey b. Ahmed, Osman Beşe çukadâr ve gayruhüm mine’l-[hâzırîn.]