Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 491 Hüküm no: 501 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi ve Mustafa Çelebi’nin babalarının terekesinden bazı eşyaları almakla itham ettikleri Ramazan Bey aleyhine açtıkları davada sulh oldukları Mahmiye-i İstanbul’da Molla Hüsrev mahallesi sükkânından olup bundan akdem vefât eden Mû‘âmeleci Halil Ağa’nın sulbî kebîr oğulları Mehmed Çelebi ve Mustafa Çelebi meclis-i şer‘-i hatîr-i lâzimü’t-tevkīrde işbu bâ‘isü’l-kitâb Ramazan Bey b. Mehmed mahzarında herbiri tav‘an ikrâr ve i‘tirâf edip babamız mezbûr Halil Ağa vefât etdikde vasî-i muhtârımız olan merhûm Mehmed Efendi’nin yanında mezbûr Ramazan Bey hizmetinde olmağla mûrisimiz müteveffâ-yı mezbûrun terekesinden yirmi beş riyâlî guruş kıymetli bir mercan tesbîh ve yirmi riyâlî guruş kıymetli bir mi‘râdî? sîm gılâflı kılıç ve elli guruş kıymetli bir müsta‘mel semmur kürk ve yirmi guruş kıymetli bir kırmızı çuka yağmurluk ahz eyledin deyu mezbûr Ramazan Bey’den da‘vâ ve taleb eylediğimizde ol dahi inkâr etmekle beynimizde münâza‘ât-ı kesîre vâkı‘a olmuşidi el-hâletü hâzihî beynimize muslihûn tavassut edip eşyâ-i mezkûre da‘vâsından bizi merkūm Ramazan Bey an-inkâr bin akçeye sulh eyledikde biz dahi sulh-ı mezbûru kabûl ve bedel-i sulh olan meblağ-ı mezbûr bin akçeyi merkūm Ramazan Bey yedinden tamâmen ahz u kabz edip eşyâ-i mezkûre da‘vâsından zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik min ba‘d merkūm Ramazan Bey üzerine eşyâ-i mezkûreye müte‘allika bi-vechin mine’l-vücûh ve sebebin mine’l-esbâb da‘vâ ve nizâ‘ımız kalmadı dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sâbi‘ min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Mehmed Efendi b. Veli Efendi, Ahmed Efendi b. Mehmed, Mustafa Efendi b. Muharrem, Süleyman Beşe çukadâr, Mehmed b. Hüseyin, Mehmed b. Halil, Mehmed b. Kasım, Hasan b. İsmail, Mehmed b. Abdullah ve gayruhüm mine’l-[hâzırîn.]