Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 587 Hüküm no: 613 Orijinal metin no: [93a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hanım bt. Abdüllatif Paşa’nın Edirne’ye bağlı Ada nahiyesindeki bazı emlak ve arazisini Ali Ağa b. Cafer’e satıp bazılarının da kullanım hakkını devrettiği Mahmiye-i İstanbul’da Avratpazarı kurbünde Hobyar mahallesinde sâkine umdetü’l-muhadderât kıdvetü’l-muvakkarât Şerîfe Fâtıma Hânım bt. es-Seyyid Abdüllatif Paşa tarafından zikri âtî mülk bahçeleri bey‘a ve arâzi ve çayırları ferâğ ve tefvîze vekâlet ve âharı tevkîle izin iddiâ edip mûmâ-ileyhâ Şerîfe Fâtıma Hânım’ın sadrî oğlu ve sâbıkā mirahor-ı kebîr olup hâlâ Dergâh-ı âlî kapıcıbaşılarından olan umdetü’l-emâcid ve’l-e‘âlî es-Seyyid Mustafa Ağa b. Hasan Paşa tarafından husûs-ı âti’z-zikre vekîl olup vech-i âtî üzere vekâleti şer‘an sâbite olan mahmiye-i Edirne’de Veliyyüddin mahallesi imâmı Mustafa Halîfe b. Abdullah mahmiye-i Edirne’de meclis-i şer‘-i şerîfde mahmiye-i Edirne kazâsı nevâhisinden Ada nâhiyesinde vâki‘ Timurtaş nâm karye sükkânından sâhibü hâze’l-kitâb fahrü’l-cüyûş Ali Ağa b. Ca‘fer nâm cündi mahzarında bi’l-vekâle ikrâr ve i‘tirâf edip müvekkilim mûmâ-ileyhin vâlidesi ve müvekkilesi mûmâ-ileyhâ Şerîfe Fâtıma Hânım’ın zikri âtî bey‘in sudûruna değin silk-i mülk-i sahîhinde münselik mülk ve hakkı olup karye-i mezbûrede vâki‘ bir tarafdan Hasan b. Abdullah mülküne ve üç tarafdan tarîk-ı âmma müntehî bir çatma anbarı ve bir harâbe ahır ile bir harâbe tahtânî odayı ve Kabak Suyu demekle ma‘rûf nehr-i cârî ve birkaç kestane ağacını müştemil olan mülk menzilini kâffe-i hukūk ve merâfıkı ile ve yine karye-i mezbûrede vâki‘ birbirine muttasıl İkidolaplı demekle ma‘rûf olan bahçenin merhûm Timurtaş Vakfı’na senede üç yüz akçe mukāta‘ası ve Yedidolablı demekle ma‘rûf olan bahçenin vakf-ı mezbûra senede iki yüz akçe mukāta‘a-i zemîni olup bir tarafdan İbrahim b. Abdullah mülküne ve bir tarafdan merkūm Ali Ağa mülküne ve bir tarafdan müvekkile-i mûmâ-ileyhânın taht-ı tasarrufunda olan vakıf çayıra ve bir tarafdan tarîk-ı âmma müntehî ve eşcâr-ı müsmire-i magrûseyi ve vech-i meşrûh üzere dolabları ve su kuyularını müştemil olan iki kıt‘a bahçeyi kâffe-i hukūk ve merâfıkı ile on bir bin râyic fi’l-vakt akçeye tarafeynden îcâb ve kabûlü hâvî bey‘-i bâtla müvekkilim merkūm Seyyid Mustafa Ağa bi’l-vekâle merkūm Ali Ağa’ya bey‘ edip ve zikrolunan iki kıt‘a bahçenin arsaları ile zikri âtî ferâğ ve tefvîzin suduruna değin müvekkile-i mûmâ-ileyhâ Fâtıma Hânım’ın taht-ı tasarrufunda hakk-ı müfevvazı olup zikrolunan Timurtaş karyesi toprağında Kaldırımbaşı demekle ma‘rûf vâki‘ hudûdu ma‘lûm bir kıt‘a cemî‘ çayırıyla bir kıt‘a cemî‘ tarlasının ve Ali Paşaoğlu Çiftliği kurbünde vâki‘ bir kıt‘a cemî‘ çayırının ve mârrü’z-zikr bahçeler kurbünde vâki‘ ma‘lûmü’l-hudûd bir kıt‘a çayırıyla bir kıt‘a cemî‘ tarlasının ve çayır-ı mezbûr ile tarla-yı mezkûra muttasıl ırmak kenarında vâki‘ bir kıt‘a cemî‘ tarlasının ve ona mukābil yol aşırı ma‘lûmül-hudûd bir kıt‘a cemî‘ tarlasının ve bir tarafda karye-i mezbûre harmanlarına muttasıl ma‘lûmü’l-hudûd bir kıt‘a cemî‘ tarlasının ve Dimetoka yolu kenarında vâki‘ bir kıt‘a cemî‘ tarlasının Varda nâm nehr-i cârî kenarında vâki‘ bir kıt‘a cemî‘ tarlasının ve Hasan Paşadepesi demekle ma‘rûf mevzi‘de vâki‘ hudûdu ma‘lûm bir kıt‘a tarlasının ve karye-i mezbûre buzağılığı kurbünde vâki‘ bir kıt‘a ma‘lûmü’l-hudûd cemî‘ tarlasının dahi hakk-ı karâr ve tasarruflarını ma‘rifet-i mütevellî-i vakf-ı mezbûr ile bin yedi yüz râyic fi’l-vakt akçe bedel mukābilesine merkūm Ali Ağa’ya bi’l-vekâle ferâğ [ve] tefvîz edip ol dahi emlâk-ı mezbûreyi nefsi’çün iştirâ ve kabûl ve bahçe ve arsalarıyla çayırları ve tarlaları dahi tefevvüz ve kabûl ve semen-i mezbûr ile bedel-i merkūmu müvekkilim mezbûr Seyyid Mustafa Ağa bi’l-vekâle ahz u kabz ve istîfâ ve emlâk-ı mezkûre ile arsa-i mezbûre ve çayırları ve tarlaları merkūm Ali Ağa’ya fâriğan teslîm murâd etdikde mezbûr Ali Ağa tesellümden imtinâ‘ eylemişdir suâl olunup tesellümüne tenbîh olunması matlûbumdur dedikde gıbbe’s-suâl mezbûr Ali Ağa cevâbında fi’l-hakīka emlâk-i mezbûreyi ve bahçe ve arsaları ve zikrolunan çayırlar ve tarlaları vech-i muharrer üzere vâlidesi müvekkile-i mûmâ-ileyhâ Fâtıma Hânım tarafından vekîl ve tarafından âharı tevkîle izin iddiâ eden müvekkil-i mezbûr Seyyid Mustafa Ağa’dan iştirâ ve tefevvüz ve bedel-i mezkûr ile semen-i mezkûru teslîmine i‘tirâf edip vekîl-i mezbûrun müvekkil-i mezbûr Seyyid Mustafa Ağa’nın vâlidesi mûmâ-ileyhâ Şerîfe Fâtıma Hânım tarafından [93b] vech-i meşrûh üzere vekîl olup âharı tevkîle me’zûn olduğunu inkâr ile isbât-ı vekâlet etsin dedikde mûmâ-ileyhâ Fâtıma Hânım tarafından vekîl-i merkūm Mustafa Halîfe’den da‘vâ-i meşrûhunu mübeyyine beyyine taleb olundukda udûl-i Müslimînden zikrolunan Hobyar mahallesi sükkânından Ahmed Bey b. Abdullah ve Mustafa Ağa b. Hamza nâm kimesneler li-ecli’l-istişhâd meclis-i şer‘a hâzırân olup gıbbe’l-istişhâd fi’l-hakīka zikrolunan Hobyar mahallesi sâkinelerinden olup mezbûre Seyyid Mustafa Ağa’nın vâlidesi mûmâ-ileyhâ Şerîfe Fâtıma Hânım karye-i mezbûrede vâki‘ olup hudûd-ı mezkûre ile mahdûde olan cemî‘ mülk bahçelerini semen-i misline bey‘a ve zikrolunan arsaları ve çayırları ve tarlaları dahi bedel-i misli ile ferâğ ve tefvîze oğlu merkūm Seyyid Mustafa Ağa’yı bizim huzûrumuzda vekîl ve menâbına nâib nasb ve ta‘yîn edip ve âharı tevkîle izin verdikde müvekkil-i mezbûr Seyyid Mustafa Ağa dahi vekâlet-i mezbûreyi kabûl ve zikrolunan emlâk ve arsayı ve çayırları ve tarlaları mezbûr Ali Ağa’ya semen-i mezkûr ile bedel-i mezbûre bey‘ ve tefvîz ol dahi iştirâ ve kabûl ve tefevvüz ve semen-i mezbûr ile bedel-i mezkûru müvekkil-i mezbûr Seyyid Mustafa Ağa’ya tamâmen teslîm ve emlâk-ı mezbûre ile arsalarını ve çayırları ve tarlaları tesellümden imtinâ‘ ve vekâlet-i meşrûhasını merkūm Mustafa Ağa isbât etsin demekle merkūm Seyyid Mustafa Ağa dahi mezbûr Ali Ağa ile beynlerinde cârî olan ukūd-ı mezkûre ve semen-i mezkûru kabzını ikrâra mezbûr Mustafa Halîfe’yi bizim huzûrumuzda tevkîl edip ol dahi vekâlet-i meşrûhayı kabûl eyledi bu vechile merkūm Seyyid Mustafa Ağa mezbûr Ali Ağa beynlerinde cârî olan akd-i bey‘-i mezbûr ve akd-i tefevvuz-ı mezkûr sahîh ve nâfizdir biz bu husûsa şâhidleriz şehâdet dahi ederiz deyu edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a oldukdan sonra şehâdet-i mezkûre mûcebince sıhhat-i vekâlet-i mezbûreye ve akd-i bey‘-i mezbûr ile akd-i tefvîz-i mezkûrun sıhhat ve nüfuzuna ba‘de’l-hüküm mezbûr Ali Ağa emlâk-i mezbûreyi ve arsaları ve çayırları ve tarlaları tesellüme bi’l-müvâcehe ilzâm olunup mâ-vaka‘a bi’t-taleb ketb olundu. Fi’l-yevmi’l-hâmis aşer min şehri Rebî‘i’l-evvel li-sene semân ve sittîn ve elf. Şühûdü’l-hâl: ( )