Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 587 Hüküm no: 612 Orijinal metin no: [93a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey b. Behram’ın merhum Ali Kethüda b. Mustafa’ya doksan bin iki yüz yetmiş iki akçe borcu olduğunu varisleri huzurunda ikrar ettiği Vilâyet-i Rumeli’nde Ruscuk sükkânından olup sâbıkā Vidin Sancağı Bey’i olan umdetü’l-ümerâ’i’l-kirâm Mehmed Bey b. Behram meclis-i şer‘de mahmiye-i İstanbul’da Baba Hasan Alemî mahallesi sükkânından olup bundan akdem vefât eden Ali Kethüdâ b. Mustafa’nın zevce-i menkûhası olup sulbî sagīr oğlu Osman Çelebi ile sulbiye sagīre kızı İsmihan’ın tesviye-i emrlerine kıbel-i şer‘den mansûbe vasîleri olan Şehbaz Hâtun bt. Abdülmennan’ın husûs-ı âti’l-beyâna vekîl-i müsecceli olan İbrahim Beşe b. Hüseyin mahzarında ikrâr edip müteveffâ-yı mezbûrdan hâl-i hayatında iki yük otuz dört bin akçe istikrâz ve kabz edip kable’l-ahz ve’l-istîfâ fevt olmakla meblağ-ı mezbûr iki yük otuz dört bin akçe irsen sagīrân-ı mezbûrân ile zevce-i merkūme Şehbaz’a intikāl eyledikden sonra meblağ-ı mezbûrun yüz kırk iki bin yedi yüz yirmi sekiz akçesine sagīrân-ı mezbûrânın mukaddemâ tesviye-i emrlerine vasîleri olan Ali Efendi ile zevce-i mezbûre Şehbaz Hâtun’un taraflarından meblağ-ı mezbûru kabza vekîlleri olan es-Seyyid Mahmud Efendi’ye teslîm edip el-ân zimmetimde doksan bin iki yüz yetmiş iki akçe bâkī kalmışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min Rebî‘i’l-evvel li-seneti’l-mezbûre. Şühûdü’l-hâl: Mehmed Efendi b. ( ), Mehmed Çavuş b. İbrahim, Hasan Çavuş b. Hüseyin, İbrahim Çelebi b. Abdullah, Mehmed b. Ahmed.