Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 590 Hüküm no: 615 Orijinal metin no: [93b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı İbrahim’in terekesi hususunda karısı Halime’nin merhumun muhallefatını zapteden oğlu Süleyman Çelebi’nin zimmetini ibra ettiği Mahmiye-i Edirne’de Sultan Selim mahallesinde sâkin iken bundan akdem fevt olan el-Hâc İbrahim’in verâseti sulbî kebîr oğlu Süleyman Çelebi’ye ve zevce-i metrûkesi Hadice nâm hâtun ile zevce-i uhrâsı Halime nâm hâtuna münhasıra olduğu şer‘an zâhir oldukdan sonra mezbûre Halime tarafından husûs-ı âti’l-beyâna vekîl olup nakl-i şer‘î ile vekâleti sâbite olan Mehmed Ağa b. Ali mahmiye-i Edirne’de meclis-i şer‘de müteveffâ-yı mezbûrun muhallefâtına vâzı‘u’l-yed olan mezbûr Süleyman Çelebi mahzarında ikrâr edip müvekkilem mezbûreye müteveffâ-yı mezbûrun akār ve menkūl ve nukūd ve esâs-ı beyt ve evânî-i nuhâsiyye ve gayr-ı nuhâsiyye ve ism-i mâl ıtlâk olunur cemî‘ muhallefâtında ber-mûceb-i defter-i kassâm nısf-ı sümün hisse-i şer‘iyyesine isâbet eden elli bin akçemi müteveffâ-yı mezbûrun zimmetinde mütekarrir olan dört bin akçemi mezbûr Süleyman Çelebi yedinden bi’t-tamâm vekâleten alıp kabz eylediğimden sonra müvekkilem mezbûre Halime müteveffâ-yı merkūma hâl-i hayatında câriye alıverilmek için def‘ eylediği yedi bin akçe ve yirmi altı miskāl bir tek altın bilezik ve üç bin akçe kıymetli bir çift la‘l küpeyi mezbûr Süleyman Çelebi’den vekâleten da‘vâ eylediğimde ol dahi bazısını ikrâr ve bazısını inkâr etmekle beynimizde münâza‘ât-ı kesîre vukū‘undan sonra mâbeynimize muslihûn tavassut edip eşyâ-i mezbûre da‘vâsından mezbûr ile beni on bin akçe üzerine sulh eylediklerinde ben dahi sulh-ı mezbûru vekâleten kabûl ve bedel-i sulh olan meblağ-ı mezbûru yedinden tamâmen alıp kabz eyledim ba‘de’l-yevm müvekkilem mezbûre Halime’nin muhallefât-ı mezbûre ve eşyâ-i merkūmeye müte‘allik mezbûr Süleyman Çelebi ile vechen mine’l-vücûh ve sebeben mine’l-esbâb da‘vâ ve niza‘ı yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min şehri Rebî‘i’l-evvel li-seneti’l-mezbûre. Şühûdü’l-hâl: El-hâc İbrahim Çelebi b. ( ), el-Hâc Yusuf b. Veli, el-Hâc Halil b. İbrahim, el-Hâc Yusuf b. Mustafa, Mustafa Ağa b. Ali, el-Hâc Mahmud b. Salih Ağa, el-Hâc Mehmed b. Bâli, el-Hâc İbrahim an-Gelibolu, İvaz Ağa b. ( ).