Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 591 Hüküm no: 617 Orijinal metin no: [94a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıbti Mehmed b. Nazar’ın İneoğlu köyünde Fatma bt. Mehmed’den satın aldığı menzili iade edip parasını geri aldığı Mahmiye-i Edirne muzâfâtından Ada nâhiyesine tâbi‘ İneoğlu nâm karyede vefât eden Mehmed b. Abdullah’ın verâseti sulbî oğlu Ahmed ve sulbiye kızı Fâtıma’ya münhasıra olduğu şer‘an zâhir oldukdan sonra Kıbtî tâifesinden Mehmed b. Nazar nâm kimesne mahmiye-i mezbûrede meclis-i şer‘de mezbûrân Ahmed ve Fâtıma mahzarlarında ikrâr ve i‘tirâf edip müteveffâ-yı mezbûrun ile’l-vefât mülkü olup karye-i mezbûrede vâki‘ lede’l-ahâlî ma‘lûmü’l-hudûd menzilin ba‘de vefâtihî bi-hasebi’l-irsi’ş-şer‘î sülüsânı mezbûr Ahmed’e ve sülüsü merkūme Fâtıma’ya intikāl etmişiken mezbûre Fâtıma menzil-i mezbûrun cümlesini kendi tarafından asâleten ve sagīr-i mezbûr tarafından vesâyeten bin dört yüz akçeye bâtten bana bey‘ ve teslîm ve kabz-ı semen ben dahi iştirâ eylediğimden sonra üç yüz akçe harc edip bir duvar binâ ve ihdâs etmişidim hâlâ mezbûr Ahmed menzil-i mezbûrun bana isâbet eden sülüsânını ben sagīr iken kız karındaşım Fâtıma fuzûlen bey‘ eylemiş deyu hissesinde bey‘i mücîz olmayıp da‘vâ etmeğin ben dahi mezbûrân Ahmed ve Fâtıma’ya semen deyu verdiğim bin dört yüz akçe ile duvar-ı mezkûra harc u sarf eylediğim üç yüz akçe ki cem‘an bin yedi yüz akçeyi merkūmân yedlerinden tamâmen alıp kabz eyledim ba‘de’l-yevm menzil-i mezbûrda vechen mine’l-vücûh ve sebeben mine’l-esbâb hak ve alâkam kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 2 min Rebî‘ülâhir sene [10]68. Şühûdü’l-hâl: Nasûh Bey b. Mahmud, Ahmed Bey b. Zülfikar, Mustafa b. Nuri, İbrahim Bey b. ( ).