Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 592 Hüküm no: 619 Orijinal metin no: [94a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Gardan v. Kirko’nun Premedi’ye bağlı Mandıracık köyündeki mülk menzilini Koka v. Nikola’ya üç yüz akçeye satıp dört adet tarlasının da kullanım hakkını devrettiği Fi’l-asl Premedi kazâsına tâbi‘ Orgora nâm karyeden olup hâlâ mahmiye-i Edirne’de bakkal olan Gardan v. Kirko mahmiye-i mezbûrede meclis-i şer‘de Dimetoka kazâsına tâbi‘ Mandıracı[k] nâm karye sükkânından Koka v. Nikola muvâcehesinde ikrâr ve i‘tirâf edip zikrolunan Mandıracı[k] karyesinde vâki‘ bir tarafdan Mitre v. Kondi ve bir tarafdan Kosta v. Kondi mülkleri ve bir tarafdan vadi ve bir tarafdan tarîk-ı âm ile mahdûd bir çatma odama ve zât-ı eşcâr bahçe ve koruyu müştemil mülk menzilimi cümle-i tevâbi‘ ve levâhıkı ile mezbûr Kirko’ya üç yüz akçeye bâtten bey‘ ve teslîm ol dahi tesellüm ve kabz eyledikden sonra taht-ı tasarrufumda olup karye-i mezbûre sınırında vâki‘ tahmînen on keyl tohum istî‘âb eder lede’l-ahâlî ma‘lûmü’l-hudûd dört kıt‘a tarlaların dahi hakk-ı tasarrufunu sâhib-i arz ma‘rifetiyle mezbûr Kirko’ya üç yüz akçe bedel mukābilesinde ferâğ ve tefvîz ve teslîm ol dahi tefevvüz ve kabûl ve kabz edip semen-i mezbûr üç yüz akçe ile bedel-i mezkûru yedinden tamâmen alıp kabz eyledim ba‘de’l-yevm zikrolunan menzil mülk-i müşterâsı ve tarlalar taht-ı tefevvuzundadır keyfe mâ yeşâ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 2 min şehri Rebî‘i’l-âhir li-seneti’l-mezbûre. Şühûdü’l-hâl: Abdulbâki Efendi b. Yusuf Efendi el-kādî, Mehmed Çavuş b. Ali el-mübâşir, Ahmed Çelebi b. Mehmed, İsa Bey el-muhzır, el-Hâc Ali b. ( ).