Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 593 Hüküm no: 620 Orijinal metin no: [94a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimetoka’ya bağlı Mandıracık ahalisinden bazılarının kendileriyle birlikte cizye vergisi ödemesi gerektiği iddiasıyla Bakkal Gardan v. Kirko aleyhine açtıkları davada sulh oldukları Dimetoka kazâsına tâbi‘ Mandıracık nâm karye ahâlîsinden Martin v. Kirko ve Yanko v. Kirko ve Koka v. Nikola ve Mitre v. Aston ve Dimo v. İzgori kendi taraflarından asâleten ve sâir ahâlî-i karye taraflarından husûs-ı âti’l-beyâna sâbitü’l-vekâle vekîller olmakla vekâleten mahmiye-i Edirne’de meclis-i şer‘-i şerîfde fi’l-asl Premedi kazâsına tâbi‘ Orgora nâm karyeden olup hâlâ mahmiye-i mezbûrede bakkal olan Gardan v. Kirko muvâcehesinde herbiri ikrâr edip karye-i mezbûrede vâki‘ kenîse vakfı malından dört yüz akçe olup ahâlî-i karye-i mezbûre vakf-ı mesfûra nâzır olmakla nezâretimiz hasebiyle meblağ-ı mezbûru yedinden tamâmen alıp kabz eylediğimizden sonra mezbûr Gardan’ın babası merkūm Kirko karye-i mezbûre defterinde ra‘iyyet kayd olmuşdur deyu mezbûr Gardan’dan ra‘iyyetimiz oğlu olmak üzere senede lâzım gelen dört yüz akçe cizyeden târih-i kitâba gelinceye bir senede müctemi‘ olan cem‘an iki bin sekiz yüz akçeyi biz malımızdan edâ eyledik deyu meblağ-ı mezbûru merkūm Gardan’dan taleb ve da‘vâ eylediğimizde ol dahi cevâbında babam mezbûr Kirko karye-i mezbûre defterine geçmemişdir ve hâlâ ben mahmiye-i mezbûre keferesi defterinde ra‘iyyet kayd olmuşumdur deyicek beynimizde münâza‘ât-ı kesîre vâkı‘a olmuşidi el-hâletü hâzihî beynimize muslihûn tavassut edip cizye-i mezbûre da‘vâsından mezbûr Gardan ile bizi bin altı yüz akçe üzerine inşâ-i akd-i sulh eylediklerinde biz dahi sulh-ı mezbûru kabûl ve bedel-i sulh olan meblağ-ı mezbûru yedinden tamâmen alıp kabz eyleyip cizye-i mezbûreye müte‘allik cemî‘ de‘âvî ve mutâlebât ve eymân ve muhâsamâtdan zimmetini ibrâ-i âm ile ibrâ ve ıskāt eyledik ve mezbûr Gardan karye-i mezbûrede vâki‘ lede’l-ahâlî ma‘lûmü’l-hudûd menzilini ve korusunu âhara bey‘ ve dört kıt‘a tarlasını dahi âhara ferâğ ve tefvîz etmekle karye-i mezbûreden bi’l-külliyye kat‘-ı alâka etmeğin bizim dahi cizye-i mezbûre ve gayra müte‘allik mezbûr Gardan ile vechen mine’l-vücûh ve sebeben mine’l-esbâb da‘vâ ve nizâ‘ımız yokdur dediklerinde mâ-vaka‘a bi’t-taleb ketb olundu. Fi’l-yevmi’r-râbi min şehri’l-mezbûre [li-seneti’l-mezbûre.] Şühûdü’l-hâl: Mehmed Çavuş b. Ali el-mübâşir, el-Hâc Ali b. ( ), Ahmed Çelebi b. Mehmed, İbrahim b. Hüseyin subaşı.