Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 607 Hüküm no: 634 Orijinal metin no: [97a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa b. Ali’nin Emin Sinan ve Divane Ali mahallelerindeki iki mülk menzilini Yusuf Ağa b. Hacı Mirza’ya sekiz yüz yetmiş bin akçeye sattığı Mahmiye-i İstanbul’da Gedikpaşa kurbünde Emin Sinan mahallesinde sâkin umdetü’l-a‘yân Halil Ağa b. Ali mahmiye-i Edirne’de meclis-i şer‘de Dergâh-ı âlî kapıcıbaşılarından işbu kitâbın sâhibi iftihârü’l-emâcid ve’l-ekârim câmi‘u’l-mehâmid ve’l-mekârim Yusuf Ağa b. el-Hâc Mirza mahzarında ikrâr ve i‘tirâf edip zikri âtî bey‘in sudûruna değin mülküm olup nısf arsasının senede ( ) Vakfı’na ( ) akçe mukāta‘ası olan mahalle-i mezbûrede vâki‘ bir tarafı imâma meşrûta odalara ve bir tarafı âhar mülküm olan arsaya ve bir tarafı bazen umdetü’l-müderrisîn Muslı Efendi arsasına ve bazen tarîk-ı hâssa ve bir tarafı Sünbüli Hâtun Vakfı’na müntehî üç tabakayı muhtevî olup tabaka-i ulyâsı bir kubbe tavanlı oda ve içerden girecek bir dehlîz ve bir kahve odası ve yanında bir nîm sofa ve sofaya muttasıl bir kebîr oda ve bir kebîr orta sofa ve yanında bir kebîr oda ve bir nîm sofa ve yanında bir oda ve üstünde iki hazîne odası ve altında iki oda ve bir sofa ve bir kenîf ve tabaka-i vüstâsı bir câmekânlı oda ve iki kubbeli kulleteynli üç lüleli hamam ve külhan odası ve bir kenîf ve içeriye girecek bir dehlîz ve on bir hizmetkâr odası ve bir kiler ve bir kenîf ve sokak kapısı üstünde dört bâb oda ve tabaka-i süflâsı yarım masura mâ’-i cârî mecrâsıyla ve su mahzeni ve dehlîz ve bir esvab mahzeni ve iki ahır ve bir samanlık ve bi’r-i mâ ve bir kenîfi müştemil mülk menzilimi bi-cümle-i hudûd ve hukūk ve merâfıkıyla mezbûr Yusuf Ağa’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile sekiz yük fıddî râyic fi’l-vakt akçeye bey‘ ol dahi iştirâ ve kabûl eyledikden sonra yine silk-i mülkümde olup arsası tûlen ve arzan be-hesâb-ı şatrancî bin sekiz yüz kırk bir buçuk zirâ‘ arsa olup menzil-i mezbûra mülâsık ve muttasıl senede el-Hâc Hızır Vakfı’na bin seksen akçe ve Meş‘aleci Hasan Vakfı’na bin seksen akçe ve Selveri Hâtun Vakfı’na dört yüz akçe mukāta‘ası olup mahmiye-i mezbûrede Dîvâne Ali mahallesinde vâki‘ bir tarafı imâm vakfı olan odalara ve bir tarafı İplikçi Ahmed Çelebi mülküne ve bir tarafı Mehmed Çelebi el-attâr mülküne ve bir tarafı bazen Kapudan Hasan Paşa Vakfı’na ve bazen menzil-i mezkûrun selâmlığına müntehî bir ahırı, samanlık ve bir harâbe oda ve arsa-i hâliyeyi müştemil mülk menzilimi cemî‘ hudûd ve hukūk ve merâfıkı ile mezbûr Yusuf Ağa’ya yetmiş bin mezbûru’n-na‘t akçeye bâtten bey‘ edip ol dahi iştirâ ve kabûl eyledikden sonra zikrolunan sekiz yük akçe ile yetmiş bin akçe ki cem‘an sekiz yük yetmiş bin akçeyi işbu Yusuf Ağa yedinden bi’t-tamâm ve’l-kemâl ahz u kabz eyleyip zikrolunan menzilleri mahallinde kabza taslît eyledim ba‘de’l-yevm menzileyn-i mezbûreynde ve semenlerinde vechen mine’l-vücûh hak ve alâkam kalmadı keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min şehri Rebî‘ülahir li’s-seneti’l-mezbûre. Şühûdü’l-hâl: eş-Şühûdü’s-sâbikūn.