Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 608 Hüküm no: 635 Orijinal metin no: [97b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Abdürrahim’in Kefeli İbrahim Bey b. Mahmud’dan beş yüz guruş alacağı olduğu Mahmiye-i İstanbul’da ( ) mahallesi sükkânından olup sa‘âdetlü Kaya Sultan hazretlerinin kethüdâları olan iftihârü’l-emâcid ve’l-ekârim câmi‘u’l-mehâmid ve’l-mekârim Ahmed Ağa b. Abdürrahim tarafından husûs-ı âtîye vekîl olup vekâleti bi-mâ-hüve nehcü’s-sübût şer‘an sâbite olan umdetü’l-a‘yân İbrahim Ağa b. Ali meclis-i şer‘-i hatîrde Kefeli İbrahim Bey b. Mahmud nâm cündi mahzarında üzerine takrîr-i da‘vâ edip müvekkilim mezbûr Ahmed Ağa’nın cihet-i karz-ı şer‘îden mezbûr İbrahim Bey zimmetinde beş yüz kıt‘a riyâlî guruş hakkı vardır hâlâ meblağ-ı mezbûru vekâletim hasebiyle mezbûr İbrahim Bey’den taleb ederin suâl olunsun dedikde gıbbe’s-suâl mezbûr İbrahim Bey cevâbında müvekkil-i mezbûr İbrahim Ağa’ya cihet-i karzdan zimmetinde beş yüz riyâlî guruş deyni olduğunu tav‘an mu‘terif olmağın mûcebince ba‘de’l-hüküm mâ-vaka‘a bi’t-taleb ketb olundu. Fi’l-yevmi’r-râbi‘ aşer min şehri Rebî‘ülâhir li’s-seneti’l-mezbûre. Şühûdü’l-hâl: Şa‘ban Ağa b. ( ), Derviş Çelebi b. ( ), İbrahim Bey b. ( ), Mehmed Bey b. ( ), Muharrem Bey b. ( ), Ali Efendi el-kādî.