Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 610 Hüküm no: 637 Orijinal metin no: [97b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ârif Mehmed Efendi b. Ahmed’in Ali b. Ahmed’den kefaletinden dolayı yüz guruş alacağı olduğu Vilâyet-i Rumeli’nde Köstendil nâm kasabadan işbu râfi‘ü’l-kitâb Ârif Mehmed Efendi b. Ahmed nâm kimesne mahmiye-i Edirne’de mahfil-i kazâda Usturumca nâm kasaba sükkânından Ali b. Ahmed mahzarında üzerine takrîr-i da‘vâ edip bundan akdem mezbûr Ali’nin karındaşı olup hâlâ Peline kādısı olan Mustafa Efendi zimmetinde cihet-i karz-ı şer‘îden on guruş ve evsâfı beynimizde ilm-i şer‘le ma‘lûme yedimden müşterâ ve makbûz iki âl at ve bir kır bârgir semenlerinden dahi doksan guruş ki cem‘an yüz guruş hakkım olup meblağ-ı mezbûr karındaşı merkūm Ali emr ve kabûlünü hâviye kefâlet-i sahîha-i şer‘iyye ile kefîl olmuşidi hâlâ meblağ-ı mezbûru kefâleti hasebiyle mezbûr Ali’den taleb ederin suâl olunsun dedikde gıbbe’s-suâl mezbûr Ali cevâbında fi’l-vâki‘ karındaşım mezbûr Mustafa Efendi’nin vech-i muharrer üzere müdde‘î-i mezbûra cihet-i karzdan ve zikrolunan atlar ve bârgir bahâlarından mezbûru’n-na‘t yüz kıt‘a guruş deyni olup meblağ-ı mezbûre ben kefîl olup hâlâ cihet-i kefâletden meblağ-ı mezbûr zimmetimde müdde‘î-i merkūma lâzimü’l-eda deynimdir deyu tav‘an ikrâr ve i‘tirâf etmeğin mûcebince meblağ-ı mezbûrun edâsıyla merkūm Ali ilzâm olunup mâ-vaka‘a bi’t-taleb ketb olundu. Fi’l-yevmi’l-ışrîn min şehri Rebî‘i’l-âhir li-sene semân ve sittîn ve elf. Şühûdü’l-hâl: Abdullah Efendi b. Mustafa, Veli b. Süleyman, Mehmed b. Ahmed, İbrahim Bey b. Ömer, Abdurrahman Bey b. ( ) el-cündi.