Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 609 Hüküm no: 636 Orijinal metin no: [97b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Halil’in emanet olarak verdikten sonra ölen atının bedelinin Serkiz v. Aslan tarafından tazmini Mahmiye-i İstanbul’da Mesih Paşa-yı atîk mahallesinde sâkin işbu râfi‘ü’l-kitâb umdetü’l-a‘yân Ahmed Ağa b. Halil mahmiye-i Edirne’de mahfil-i kazâda katırcı tâifesinde olup İstanbul’da Topkapısı dâhilinde sâkin Serkiz v. Aslan nâm Ermeni muvâcehesinde üzerine takrîr-i da‘vâ edip bundan akdem mezbûr Serkiz yedine silk-i mülkümde münselik bir re’s doru bârgirimi Baba-yı Atîk nâm kasabada gāib ani’l-meclis Safer nâm Ermeni’ye îsâl ve teslîm ve eğer bulmazsan geri bana Edirne’ye irsâl eyle deyu def‘ ve teslîm ol dahi kabz ve tesellüm ettiğinden sonra mezbûr Safer’i bulmamağla izin ve emrim yoğiken fuzûlen mezkûr bârgir ile Ruscuk’a ondan İstanbul’a varıp yine gelirken esnâ-yı tarîkde istihlâk etmişdir suâl olunup yevm-i helâkde kıymet-i şer‘iyyesini taleb ederim dedikde gıbbe’s-suâl mezbûr Serkiz cevâbında fi’l-hakīka kaziyye vech-i meşrûh üzeredir lâkin müdde‘î-i mezbûr mezkûr bârgiri bana hîn-i teslîmde kasaba-i mezbûrede merkūm Safer’i bulmazsan İstanbul’a bin bile götür deyu izin verip ben dahi onun iznine binâen götürdüm ve esnâ-yı tarîkda bilâ-te‘ad helâk olup damândan berî oldum deyu def‘le mukābile edicek gıbbe’l-istintâk ve akībe’l-inkâr mezbûr Serkiz’den def‘-i mezkûrunu mübeyyin beyyine taleb olundukda ityân-ı beyyineden izhâr-ı acz edip istihlâf etmeğin müdde‘î-i mezbûra fi’l-vâki‘ kasaba-i mezbûrede mezkûr Safer’i bulmazsan mezkûr bârgiri İstanbul’a götür deyu mezbûr Serkiz’e izin vermediğine yemîn teklîf olundukda ol dahi hasbe’l-mes’ûl yemîn billâhi’l-aliyyi’l-azîm etmeğin mûcebince kasaba-i mezbûreden zikrolunan bârgiri alıp götürdü ki te‘addî olmağın mezkûr bârgirin kıymet-i şer‘iyyesini damân ile ba‘de’l-hükm mâ-vaka‘a bi’t-taleb ketb olundu. Fî 18 min şehr-i mezbûr li’s-seneti’l-merkūme. Şühûdü’l-hâl: İbrahim Bey b. Ömer el-cündi, el-Hâc Hüseyin el-cündi, Abdurrahman Bey el-cündi, Salih b. ( ).