Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 611 Hüküm no: 640 Orijinal metin no: [98a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey b. Enbiya’nın Osman Beşe b. Ali’ye mudarabe suretinde aldığı elli guruş ve üç bin iki yüz akçe borcu olduğu Zümre-i sipâhiyândan olup mahmiye-i Edirne’de Ağaçpazarı kurbünde Pirincî Mehmed Çelebi odasında sâkin Mehmed Bey b. Enbiyâ nâm cündi mahmiye-i mezbûrede Dîvân-ı Hümâyûn’da ma‘kūd mahfil-i kazâda kasab tâifesinden olup mahmiye-i mezbûrede Kuyu nâm mevzi‘de vâki‘ Çokalca mahallesinde sâkin Osman Beşe b. Ali mahzarında üzerine takrîr-i da‘vâ edip bundan akdem mezbûr Osman Beşe’ye zikrolunan oda dâhilinde bi-tarîkı’l-müdârabe elli kıt‘a esedî guruş ile üç bin iki yüz akçe def‘ ü teslîm ol dahi tesellüm ve kabz etmişidi hâlâ cemî‘ meblağ-ı mezbûru merkūm Osman Beşe’den taleb ederin suâl olunsun dedikde gıbbe’s-suâl mezbûr Osman Beşe cevâbında müdde‘î-i mezbûrdan ancak bin akçe ahz u kabz eylediğini ikrâr mâ‘adâ altı bin akçemi inkâr edicek müdde‘î-i mezbûrdan ziyâdeyi mübeyyine beyyine taleb olundukda udûl-i ricâlden zikrolunan oda sükkânından olup zümre-i mezbûreden Ömer Bey b. Mehmed ve Eyüb Bey b. Ali ve Katırcı Hanı’nda sâkin Ali Bey b. İbrahim nâm kimesneler meclis-i ma‘kūd-ı mezbûra hâzırûn olup istişhâd olunduklarında fi’l-vâki‘ müdde‘î-i mezbûr Mehmed Bey zikrolunan oda dâhilinde bizim huzûrumuzda bi-tarîkı’l-müdârabe merkūm Osman Beşe’ye elli kıt‘a esedî guruş ile üç bin iki yüz akçe def‘ ü teslîm ol dahi tesellüm ve kabz eyledi biz bu husûsa şâhidleriz şehâdet dahi ederiz deyu edâ-i şehâdet-i şer‘iyye eylediklerinde şühûd-ı mezbûrûn umdetü erbâbi’t-tahrîr ve’l-kalem Ali Efendi b. Yusuf ve Mustafa Çavuş b. Ya‘kub ve Mehmed Bey b. Ali ve Ali Bey b. Timur ile ta‘dîl ve tezkiye olunduklarından sonra şehâdetleri makbûle olmağın mûcibiyle ba‘de’l-hüküm mâ-vaka‘a bi’t-taleb ketb olundu Fi’l-yevmi’s-sâmin ve’l-ışrîn min şehri Rebî‘ülâhir li’s-seneti’l-mezbûre. Şühûdü’l-hâl: Sun‘ullah Ağa kethüdâ-i sipâhiyân, Mehmed Bey b. el-Hâc Hüseyin, İsmail Bey b. Mehmed, Mehmed Bey b. Ali.