Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 612 Hüküm no: 641 Orijinal metin no: [98a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdüllatif Ağa b. Mehmed Bey’in hazinedarı Osman Bey b. Hasan zimmetinde kalan eşyasını almak üzere İbrahim Efendi’yi vekil tayin ettiği Mahmiye-i İstanbul’da Şehzâde Câmi‘i kurbünde sâkin olup Dergâh-ı âlî kapıcıbaşılarından iftihârü’l-emâcid ve’l-ekârim câmi‘u’l-mehâmid ve’l-mekârim Abdüllatif Ağa b. el-merhûm Mehmed Bey tarafından husûs-ı âti’l-beyâna vekîl olup Ali Bey b. Ca‘fer ve diğer Ali Bey b. Yusuf şehâdetleriyle şer‘an vekâleti sabite olan İbrahim Efendi b. Ahmed el-müderris mahmiye-i Edirne’de meclis-i şer‘-i hatîrde müvekkil-i mezbûrun sâbıkā hazînedârı olup medîne-i Ebî Eyyûb-i Ensârî’de Ferhad Paşa mahallesinde sâkin Osman Bey b. Hasan mahzarında bi’l-vekâle ikrâr ve takrîr-i kelâm edip müvekkil-i mûmâ-ileyh bundan akdem İstanbul’da kapıkethüdası olan Mehmed Beşe b. Siyavuş’a îsâl için bir def‘a bin altı yüz yirmi sekiz guruş ve bir def‘a iki bin beş yüz guruş cem‘an dört bin yüz yirmi sekiz riyâlî guruş mezbûr Osman Bey’e def‘ ü teslîm ol dahi ahz u kabz edip meblağ-ı mezbûru merkūm [Mehmed] Beşe’ye def‘ u teslîm etmeyip kendi masârıfına sarf ve istihlâk etmekle meblağ-ı mezbûr zimmetinde deyn oldukdan sonra meblağ-ı mezbûrdan müvekkil-i mezbûrun gāib ani’l-meclis Dergâh-ı âlî yeniçerilerinin başçavuşu Yazıcı Ahmed Yazıcı’ya deyni olan beş yüz elli riyâlî guruşu müvekkil-i mezbûrun emriyle edâ ve teslîm edip mezbûr Yazıcı Ahmed yedinden meblağ-ı mezbûr mukābilesinde rehin olan mücevher iki kılabdan ve mücevher bir tarak ve mücevher bir eğer kabz edip meblağ-ı bâkī üç bin beş yüz yetmiş sekiz guruş iki bin iki yüz yetmiş sekiz riyâlî guruşunu dahi hâlâ müvekkil-i mezbûra def‘ ve teslîm edip bin üç yüz guruş zimmetinde hakkı ile zikrolunan iki kılabdan ve tarak ve eğer yedinde kalmışidi el-hâletü hâzihî meblağ-ı bâkī-i mezbûr bin üç yüz guruşu müvekkil-i mezbûr merkūm Osman Bey’den işbu hâzır bi’l-meclis Mehmed Ağa b. Hasan Efendi’ye üçü meclisde iken havâle-i sahîha-i şer‘iyye ile havâle edip onlar dahi rızâlarıyla havâle-i mezbûreyi kabûl edip müvekkil-i mezbûrun mârrü’z-zikr iki kılabdanve tarak ve eğerden gayrı mezbûr Osman Bey yedinde ve zimmetinde bir akçe ve bir habbe hakkı kalmadı dedikde gıbbe’t-tasdîkı’ş-şer‘î vekîl-i mezbûr İbrahim Efendi meclis-i merkūmda iâde-i kelâm edip müvekkil-i mûmâ-ileyh mezbûr Osman Bey yedinde olan zikrolunan iki kılabdan ve bir mücevher tarak ve mücevher eğeri mezbûr Osman Bey’den ahz u kabza ve kendüye îsâle ve kabz ve îsâl[in] mütevakkıf olduğu umûrun küllîsine tarafından vekîl ve menâbına nâib nasb ü ta‘yîn eyledi dedikde mezbûr Mehmed Ağa’dan vekâlet-i mezbûreyi kabûl ve hidemât-ı lâzımesini edâya müte‘ahhid olmağın mâ-vaka‘a bi’t-taleb ketb olundu. Fi’l-yevmi’s-sânî min-Cumâdelûlâ li’s-seneti’l-mezbûre. Şühûdü’l-hâl: Abdülkadir Efendi b. Şeyh Mehmed el-müderris, Ebûbekir Ağa b. İbrahim el-cündi, Ahmed Bey b. Abdullah et-topî, Mustafa Ağa b. Abdullah el-cündi, Mehmed Bey b. Bayezid el-cündi, İbrahim Bey b. Bayezid el-cündi, Bursalı mîralay-ı liva-i Hudâvendigâr, Abdurrahman Bey b. Musa.