Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 616 Hüküm no: 647 Orijinal metin no: [99a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey ve Mustafa Bey’in dayıları İbrahim Ağa b. Oruc’un terekesini zapteden Hasan Bey b. Abdülmümin ile terekedeki hisselerini alıp sulh oldukları Vilâyet-i Rumeli’nden Foça nâm kazâya tâbi‘ Milotine nâm karyeden olup bundan akdem Bağdad-ı behişt-âbâd kurbünde vefât eden İbrahim Ağa b. Oruc’un kız karındaşı oğulları ve zî-rahm cihetinden vârisleri olup Yusuf Paşa hazretlerinin şatır[lar]ından olan Ahmed Bey ve Mustafa Bey nâm kimesneler mahmiye-i Edirne’de meclis-i şer‘de bi’l-fi‘il Bağdad paşası olan vezîr-i rûşen-zamîr Mehmed Paşa hazretlerinin âdemlerinden işbu râfi‘ü’l-kitâb Hasan Bey b. Abdülmü’min mahzarında herbiri ikrâr ve takrîr-i kelâm edip mezbûr Hasan Bey mûrisimiz müteveffâ-yı mezbûrun muhallefâtından yirmi beş guruş kıymetli bir yeşil iskarlet çuka yağmurluk ve yirmi beş guruş kıymetli iki sîm kılıç ve on beş guruş kıymetli bir reşme ile bir sîm raht ve beş guruş kıymetli bir tabancalı tüfenk ve üç guruş kıymetli bir balta ile nakid seksen riyâlî guruş ahz u kabz edip veraseti bize ve karındaşımız gâib ani’l-meclis Mehmed Bey’e münhasıra olmağın eşyâ-i mezbûre ile meblağ-ı mezbûre ile meblağ-ı merkūmdan bizim hissemize âid olan hisse-i şer‘iyyemizi mezbûr Hasan Bey’den taleb eylediğimizde beynimizde münâza‘ât-ı kesîre vâkı‘a olmuşidi el-hâletü hâzihî beynimize muslihûn tavassut zikrolunan baltamı yedinden alıp kabz eylediğimizden sonra bâkī eşyâ-i mezbûre ile meblağ-ı mezbûr da‘vâsından bizi merkūm Hasan Bey ile yüz kıt‘a riyâlî guruş üzerine sulh eylediklerinden biz dahi sulh-ı mezbûru kabûl ve bedel-i sulh olan meblağ-ı mezbûr yüz guruşu yedinden bi’t-tamâm alıp kabz eyleyip muhallefât-ı mezbûreye müte‘allik cemî‘ de‘âvî ve mutâlebâtdan zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik ba‘de’l-yevm husûs-ı mezbûra müte‘allik vechen mine’l-vücûh mezbûr Hasan Bey kıbelinde hak ve alâkamız kalmadı dediklerinden sonra mezbûr Ahmed Bey meclis-i merkūmda ikrâr edip muhallefât-ı mezbûreden karındaşım gâib-i mezbûr Mehmed Bey’e isâbet eden elli kıt‘a guruşu emânet tarîkiyle mezbûr Hasan Bey yedinden alıp kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Hurrire fi’l-yevmi’l-hâdî ve’l-ışrîn mine’ş-şehri’l-mezbûr li’s-seneti’l-mezbûre. Şühûdü’l-hâl: es-Sâbıkūn.