Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 615 Hüküm no: 646 Orijinal metin no: [98b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed ve Mustafa beylerin Bağdat’ta vefat eden İbrahim Ağa b. Oruc’un hem kız kardeşinin oğulları hem de varisi olduklarını ispat ettikleri Fi’l-asl Vilâyet-i Rumeli’nden Foça kazasına tâbi‘ Milotine nâm karyeden olup hâlâ Yusuf Paşa hazretlerinin şâtırlarından olan Ahmed Bey ve Mustafa Bey mahmiye-i Edirne’de mahfil-i kazâda yine karye-i mezbûreden olup mukaddemâ Bağdad-ı behişt-âbâd kurbünde vefât eden İbrahim Ağa b. Oruc’un muhallefâtına vâzı‘u’l-yed olan hâlâ Bağdad paşası vezîr-i rûşen-zamîr Mehmed Paşa hazretlerinin âdemlerinden Hasan Bey b. Abdülmennan mahzarında herbiri üzerine takrîr-i da‘vâ edip biz mezbûr İbrahim Ağa’nın kız karındaşı oğulları ve zî-rahm cihetinden vârisleri olup verâseti bize ve karındaşımız gâib ani’l-meclis Mehmed Bey’e münhasıra olmağın mezbûr Hasan Bey müteveffâ-yı mezbûrun terekesinden yirmi beş riyâlî guruş kıymetli bir yeşil iskarlet çuka yağmurluk ve yirmi beş guruş kıymetli iki sîm kılıç ve on [99a] beş guruş kıymetli bir reşme ile bir sîm raht ve beş guruş kıymetli bir tabancalı tüfenk ve üç guruş kıymetli bir balta ile nakid seksen riyâlî guruşuna vaz‘-ı yed edip kabz etmeğin hâlâ meblağ-ı mezbûr ile eşyâ-yı merkūmeden bize intikāl edip hisse-i şer‘iyyemizi mezbûr Hasan Bey’den taleb ederiz suâl olunsun dedikde gıbbe’s-suâl mezbûr Hasan Bey cevâbında fi’l-vâki‘ müteveffâ-yı mezbûrun terekesinden eşyâ-i mezkûre ile meblağ-ı mezbûra vaz‘-ı yed eylediğini ikrâr lâkin müdde‘iyân-ı mezbûrânın vech-i muharrer üzere verâsetlerini inkâr edicek müdde‘iyân-ı mezbûrândan müdde‘âlarını mübeyyine beyyine taleb olundukda karye-i mezbûreden olup udûl-i ricâlden Derviş Bey b. Hasan ve Halil Bey b. Bektaş meclis-i şer‘de li-ecli’ş-şehâde hâzırân olup istişhâd olunduklarında fi’l-vâki‘ müdde‘iyân-ı mezbûrân müteveffâ-yı mezbûr İbrahim Ağa’nın kız karındaşı Sultan’ın babaları merkūm Oruc ve vâlideleri Âişe nâm hâtundur ve maskat-ı re’sleri karye-i mezbûredir veraseti müdde‘iyân-ı mezbûrân ile karındaşları gâib-i mezbûr Mehmed Bey’e münhasıradır bunlardan gayrı vârisi ve terekesine müstahıkkı olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyu edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olup mûcibiyle ba‘de’l-hükm mâ-vaka‘a bi’t-taleb ketb olundu. Şühûdü’l-hâl: Ahmed Bey b. Abdürrahim, İbrahim Ağa b. Mahmud, Fazlullah Ağa b. Hasan, Mustafa Bey b. Ahmed, Abdülmü’min Bey b. Ahmed, İsmail [b.] Mustafa el-bevvâb.