Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 618 Hüküm no: 650 Orijinal metin no: [99b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ruşen b. Mehmed b. Hasan Kethüda’nın İsmail Efendi b. Derviş Halil b. Hasan Kethüda’nın varisi olduğunu ispat ettiği Bi’l-fi‘il Hayrabolu kasabasında icrâ-yı ahkâm-ı şer‘iyye eden Fazlullah Efendi b. Mehmed kıbelinden unvânı ile mu‘anven ve tarihiyle mahtûm ve bin altmış yedi senesi Zilka‘desi’nin yirmi dördüncü günüyle müverrah nakl-i şer‘î vârid olup mazmûnu kazâ-i Hayrabolu’ya tâbi‘ Macarlar nâm karyeden Ruşen b. Mehmed b. Hasan Kethüdâ’dan meşhûdün-bih-i âti’l-beyân vechi üzere istişhâd-ı şer‘î sudûrundan sonra karye-i mezbûre sükkânından Abdünnebi b. Ali b. Abdullah ve Musa Dede b. Bâli b. Abdullah nâm kimesneler nakl ve tahvîl için mahall-i cerh ve ta‘dîle hâzırân olup fi’l-asl karye-i mezbûreden olup hâlâ vezîr-i a‘zam hazretlerinin baştezkirecesi iken Boğazhisar’da vefât edip tezkiresi bi’l-fi‘il atebe-i aliyye-i sultaniyyede başdefterdar olan düstûr-ı mükerrem İbrahim Paşa hazretlerinin yedinde mazbûta olan İsmail Efendi b. Derviş Halil b. Hasan Kethüdâ’nın müsteşhid-i mezbûr Ruşen li-ebeveyn karındaşı oğlu ve bi’l-usûbeti’n-nesebiyye vârisi olup yedinde müsteşhid-i mezbûrun babası mezbûr Mehmed ile müteveffâ-yı mezbûrun babası merkūm Derviş Halil li-ebeveyn karındaşlar olup babaları mezbûr Hasan Kethüdâ ve vâlideleri Kamer nâm hâtun ve maskat-ı re’sleri karye-i mezbûrdur ol vechile mezbûr Ruşen müteveffâ-yı mezbûrun hasran vârisidir bundan gayrı vârisi ve terekesine müstahıkkı olduğu ma‘lûmumuz değildir biz bu husûsa şâhidleriz şehâdet dahi ederiz deyu edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olduğunu müştemil olmağın kitâb-ı merkūm mahmiye-i Edirne’de Dîvân-ı Hümâyûn-ı sa‘âdet-makrûnda ma‘kūd mahfil-i kazâda mezbûr Ruşen talebiyle paşa-yı mûmâ-ileyh hazretleri muvâcehesinde feth ve kırâat ve istintak olundukda cevâbında muhallefât-ı müteveffâ-yı mezbûra vâzı‘u’l-yed olduğunu ikrâr lâkin kitâb-ı merkūmun mevlânâ-yı mezbûr kıbelinden vürûdunu inkâr edicek müsteşhid-i mezbûr Ruşen’den müdde‘âsını mübeyyine beyyine taleb olundukda şühûd-ı tarîkdan olup zeyl-i kitâb-ı naklde isimleri mektub olan Müslimînden Derviş b. Mustafa ve Halil Beşe b. Ali nâm râcil meclis-i ma‘kūd-ı mezbûra li-ecli’ş-şehâde hâzırân olup gıbbe’l-istişhâdi’ş-şer‘î fi’l-vâki‘ işbu kitâb-ı nakli mûmâ-ileyh Fazlullah Efendi’nin olup bizim huzûrumuzda imzâlayıp ve mühürleyip zeylindeki hat ve zahrındaki hateme bizi işhâd eyledi biz bu husûsa şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcibiyle ba‘de’l-hüküm mâ-vaka‘a bi’t-taleb ketb olundu. Fi’s-sâmin ve’l-ışrîn min-Cumâdelûlâ li-seneti’l-mezbûre Şühûdü’l-hâl: İvaz Ağa muhzırbaşı, Ali Beş eb. Mustafa çukadâr, İbrahim Bey b. ( ), Süleyman Bey b. ( ) muhzır.