Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 619 Hüküm no: 651 Orijinal metin no: [99b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi ve Fatma’nın babalarının Mustafa Galib Ağa’ya devrettiği vakıf evde hak iddiasıyla açtıkları davada sulh oldukları Mahmiye-i İstanbul’da Yeni Câmi‘ kurbünde Nahılbend mahallesi sükkânından olup bundan akdem mahrûse-i Edirne’de vefât eden Rahtvân Mahmud Çelebi b. ( ) nâm kimesnenin sulbî kebîr oğlu Mehmed Çelebi ve sulbiye kebîre kızı Fâtıma nâm hâtun mahrûse-i mezbûrede meclis-i şer‘-i hatîrde bi’l-fi‘il Hazîne-i hâssa kethüdâsı olan iftihârü’l-emâcid ve’l-ekârim Mustafa Gālib [Ağa] tarafından ikrâr-ı âti’l-beyânı tasdîka vekîl olup nehc-i şer‘î üzere vekâleti sâbite olan Dergâh-ı âlî kapıcıları kâtibi Ahmed Efendi b. İbrahim mahzarında herbiri ikrâr ve takrîr-i kelâm edip bundan akdem babamız müteveffâ-yı mezbûr hâl-i hayatında mezbûr Mustafa Ağa yedinden sekiz yüz kıt‘a esedî guruş istikrâz ve kabz edip ol dahi ikrâz ve teslîm eyledikden sonra zikrolunan Nahılbend mahallesi mescidi vakfından icâre-i mu‘accele-i ma‘lûmeye ve beher şehr kırk beşer akçe icâre-i müeccele ile taht-ı tasarrufunda olup bir tarafdan müvekkil-i mezbûrun vâlidesi Dilaver nâm hâtun mutasarrıfe olduğu vakıf menzil ve bir tarafdan vakf-ı mezbûrdan olan dekâkîn ve tarafeynden tarîk-ı âm ile mahdûd muhavvata-i dâhiliyyesi iki oda tahtânî ve bir sofa ve fevkānî bir odayı ve matbahı ve hâriciyesi bir fevkānî oda ve tahtında bir ahırı müştemil vakıf menzili meblağ-ı mezbûr mukābilesinde tefvîz bi’l-vefâ tarîkı üzere merkūm Mustafa Ağa’ya tefvîz etmişidi hâlâ babamız mezbûr Mahmud Çelebi vefât edip menzil-i mezbûr intikāl-i âdî ile ikimize intikāl etmeğin meblağ-ı mezbûru Mustafa Ağa’ya edâ ve teslîm ve menzil-i merkūmu istihlâs murâd eylediğimizde mûmâ-ileyh Mustafa Ağa cevâbında babanız müteveffâ-yı mezbûr hâl-i hayâtında menzil-i mezkûru mütevellîsi ma‘rifetiyle meblağ-ı mezbûr sekiz yüz esedî guruş bedel mukābilesinde bana kat‘an ferâğ ve tefvîz ben dahi vech-i muharrer üzere vâlidem mezbûre Dilaver Hâtun için tefevvüz ve kabûl ve meblağ-ı mezbûru bedel-i ferâğ olmak üzere def‘ ü teslîm eyledim hattâ vakf-ı mezbûr mütevellîsi hat ve hatemini müştemil temessük dahi vermişdi deyu vakf-ı mezbûr mütevellîsinden vâlidesi mezbûre Dilaver Hâtun üzerine olmak üzere temessük ibrâz etmekle beynimizde münâza‘ât-ı kesîre vâkı‘a olmuşidi el-hâletü hâzihî beynimize muslihûn tavassut edip da‘vâ-yı mezbûreden mezbûr Mustafa Ağa ile bizi yetmiş beş kıt‘a riyâlî guruş üzerine sulh eylediklerinde biz dahi sulh-ı mezbûru kabûl ve bedel-i mezbûrdan herbirimiz hissesine isâbet eden otuz yedi buçuk guruşu yedinden alıp kabz edip menzil-i mezbûr ve meblağ-ı mezkûra müte‘allik cemî‘ de‘âvî ve mutâlebâtdan müvekkil-i mûmâ-ileyh Mustafa Ağa ile vâlidesi merkūme Dilaver Hâtun’un zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik ba‘de’l-yevm husûs-ı mezbûra müte‘allik herbirimizden asâleten veyâ vekîllerimizde vekâleten da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmasın dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’t-târihi’l-mezbûr. Şühûdü’l-hâl: Mehmed Ağa b. Muharrem, Mustafa Çelebi b. Ahmed Efendi, İvaz Ağa b. ( ) muhzırbaşı, Mustafa Bey b. Hasan Ağa, Ahmed Bey b. ( ) el-cündi, Hasan Ağa el-bevvâbü’s-sultânî, Celeb Ahmed Bey b. ( ), Ali Bey b. Abdullah, İbrahim Bey b. Ömer.