Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 620 Hüküm no: 653 Orijinal metin no: [100a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey b. Abdullah’ın Ümmühani Hatun’a verdiği borcu oğlu ve kefili Feyzullah’tan tahsil edip her ikisinin de zimmetini ibra ettiği Mahmiye-i İstanbul hısnı ebvâbından Ahırkapısı dâhilinde sâkin Ahmed Bey b. Abdullah nâm kimesne mahrûse-i Edirne’de meclis-i şer‘-i hatîrde fahrü’l-müderrisîn Feyzullah Efendi b. Veliyyüddin mahzarında ikrâr ve takrîr-i kelâm edip târih-i kitâbdan beş ay mukaddem mezbûr Feyzullah Efendi’nin zevcesi gāibe ani’l-meclis Ümmühani bt. İbrahim Ağa nâm hâtun mahmiye-i mezbûrede Akbıyık mahallesinde vâki‘ bir tarafdan Kefeli Mustafa Çelebi mülkü ve bir tarafdan Âişe Hâtun mülkü ve bir tarafdan Fâtıma Hâtun mülkü ve bir tarafdan tarîk-ı âm ile mahdûd mülk menzilinin hâriciyesini bî-tarîkı’l-istiğlâl yüz elli kıt‘a riyâlî guruşa bana bey‘ ve teslîm ve mülknâme hüccetini yedime vaz‘ ve def‘ ben dahi vech-i muharrer üzere iştirâ ve tesellüm ve kabz ve semen-i mezbûru def‘ edip gıbbe’t-tahliyeti’ş-şer‘iyye yine hâriciye-i merkūmeyi beş ay tamâmına değin mezbûre Ümmühani Hâtun’a yedi yüz elli akçeye îcâr ve teslîm ol dahi ber-vech-i mübeyyen istîcâr ve kabûl ve tesellüm eyledikden sonra cemî‘ meblağ-ı mezbûra ve ücret-i merkūmeye zevci merkūm Feyzullah Efendi emr ve kabûlü hâviye kefâlet-i sahîha-i şer‘iyye ile kefîl olmuşidi hâlâ meblağ-ı mezbûr yüz elli guruş ile ücret-i merkūmeyi kefâlet-i mahkiyesi hasebiyle mezbûr Feyzullah Efendi yedinden bi’t-tamâm ve’l-kemâl alıp kabz edip menzil-i mezbûru rehniyyetden fek eyledim ba‘de’l-yevm husûs-ı mezbûra müte‘allik mezbûre Ümmühani Hâtun ve Feyzullah Efendi kıbellerinde vechen mine’l-vücûh alâka ve medhalim kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’t-târihi’l-mezbûre. Şühûdü’l-hâl: İbrahim Efendi rûznâmçeci-i sâbık, Osman Ağa b. Ahmed, Abdurrahman Çelebi b. Mehmed, Zülfikar Çavuş b. Abdullah, Ebûbekir Çavuş b. Mehmed.