Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 632 Hüküm no: 670 Orijinal metin no: [102b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maktul Salih Ağa b. Ali’nin miriye olan borcunun ödenmesi için mülk bahçesinin Halil Ağa b. Nurullah’a yüz yirmi bin akçeye satıldığı Mahmiye-i İstanbul’da Gedikpaşa kurbünde sâkin iken bundan akdem magzûben katl olunan Salih Ağa b. Ali’nin mîrîye deyni olduğu ecilen cümleten terekesine bâ-fermân-ı âlî vâzı‘u’l-yed olup hâlâ atebe-i aliyye-i sultâniyyede şıkk-ı evvel defterdârı olan düstûr-ı mükerrem müşîr-i mufahham İbrahim Paşa mahrûse-i Edirne’de Dîvân-ı Hümâyûn’da ma‘kūd meclis-i şer‘de sâbıkā derûn-ı saray-ı sultânîde hâs odabaşı olan işbu sâhibü’l-kitâb umdetü’l-emâcid ve’l-a‘yân Halil Ağa b. Nurullah tarafından husûs-ı âtîyi tasdîka sâbitü’l-vekâle vekîl olan karındaşı Mustafa Ağa mahzarında ikrâr ve i‘tirâf edip maktûl-i mezbûrun cihet-i şer‘iyyeden ma‘mûlün-bihâ temessükâtı nâtıka olduğu üzere taraf-ı mîrîye ma‘lûmü’l-mikdâr deyni olduğu ecilden cümle-i terekesini mîrî için kabz ve semen-i misli ile bey‘ ve semenini deyn-i mezbûr için istîfâya fermân-ı âlî sâdır olduğuna binâ’en maktûl-i mezbûrun terekesinden olup mahalle-i mezbûrede vâki‘ bir tarafdan müvekkil-i mezbûr mülküne ve bir tarafdan vakıf odalar ve bir tarafdan tarîk-ı hâs ile mahdûd ve müntehî bir köşkü ve bir sofa ve bir havuzlu ve nısf mâ-i cârîyi mecrâsıyla ve eşcâr-ı müsmire ve gayr-ı müsmireyi hâvî hadîkayı cemî‘ hudûd ve hukūk ve merâfıkı ile bin altmış altı Zilhiccesi’nin yirmi birinci gününde ba‘de arzi’t-tâlibîn ve inkıtâ‘ı’r-rağbe semen-i misli olan yüz yirmi bin akçeye müvekkil-i mezbûr Halil Ağa üzerinde karâr edip ziyâde ile tâlib-i âhar zuhûr etmemeğin ben dahi hadîka-i mezbûreyi müvekkil-i mezbûr Halil Ağa’ya yüz yirmi bin akçeye bâtten bey‘ ve teslîm ol dahi iştirâ ve tesellüm ve kabz eyledikden sonra semeni olan meblağ-ı mezbûru maktûl-i mezbûrun mîrîye olan deyni için müvekkil-i mezbûr Halil Ağa yedinden bi’t-tamâm ahz u kabz eyleyip yedine sûret-i rûznâmçe-i hümâyûn dahi verildi ba‘de’l-yevm hadîka-i mezbûre müvekkil-i mezbûrun mülk-i müşterâsı olmuşdur keyfe mâ yeşâ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin aşer min-Cumâdelâhıre li-sene semân ve sittîn ve elf. Şühûdü’l-hâl: Umdetü’l-a‘yân İmadüddin Ağa şehremîni, Ahmed Efendi b. Ebîbekir tezkireci-i Murad Paşa, Kıdvetü’l-a‘yân Ahmed Ağa başbâkīkulu, İvaz Ağa b. Hasan, Ahmed Ağa b. ( ), Ali Ağa çavuş-ı selâm, Kenan Ağa b. Abdülmennân, Süleyman b. Mehmed, el-Hâc Ca‘fer.