Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 655 Hüküm no: 696 Orijinal metin no: [107a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İvana bt. Niko’nun menzilini haksız yere zapteden Hıristodoli v. Avirne aleyhine açtığı davada haksız olduğu Dâru’l-hilâfeti’l-aliyye mahrûse-i Edirne’de el-mahmiyye mahallâtından Kiremitlik mahallesi sâkinelerinden İvana bt. Niko nâm Nasrâniye tarafından husûs-ı âti’z-zikri da‘vâya vekîl olup vekâlet-i mahkiyesi Kosta v. Yano ve Kosta v. Delko nâm zimmîler şehâdetleriyle sâbite olan zevci Kiro v. Vergo nâm zimmî meclis-i şer‘-i hatîr-i lâzimü’t-tevkīrde mahrûse-i mezbûreye tâbi‘ Üsküdar nâhiyesinde vâki‘ Kaya nâm karye zimmîlerinden işbu hâmilü’l-kitâb Hıristodoli v. Avirne nâm zimmî muvâcehesinde üzerine bi’l-vekâle da‘vâ ve takrîr-i kelâm edip karye-i mezbûre Kaya mutavattınlarından Kurt v. Kiga nâm zimmî karye-i mezbûrede vâki‘ bir tarafdan Yani v. Piyo ve bir tarafdan Arnavud Dimo ve bir tarafdan Miho nâm zimmî mülkleri ve taraf-ı râbi‘i tarîk-ı âmla mahdûd ve mümtâz olan [107b] mülk menzilini müvekkilem mezbûre İvana’ya hibe ve temlîk ve teslîm edip yedine hüccet dahi verilmişidi el-hâletü hâzihî mezbûr Hıristodoli fuzûlen zabt eder suâl olunup kasr-ı yed etdirilmesini taleb ederim dedikde gıbbe’s-suâl merkūm Hıristodoli cevâbında fi’l-vâki‘ mürd-i merkūm Kurt zikri mürûr eden menzili müvekkilesi merkūme İvana’ya hibe ve teslîm edip lâkin sulbü akd-i hibede mürd olunca beni infâk edersen hibe ettim deyu şart eyledi şart-ı mesfûr ile hibe-i mezbûre bi-hasebi’ş-şer‘i’ş-şerîf bâtıl olmağın rücû‘ edip târih-i kitâbdan dört sene mukaddem bi-cemî‘i’t-tevâbi‘ ve’l-merâfık bana iki bin dört yüz elli nakd-i râyic fi’l-vakt akçeye bâtten bey‘ ve teslîm eyledi ben dahi mülkiyet üzere mutasarrıf oldum dedikde vekîl-i mezbûr müfsid-i hibe olan şart-ı mezkûru bi’l-külliyye münkir olucak mezbûr Hıristodoli’den beyyine taleb olundukda karye-i mezbûre zimmîlerinden İstayko v. Dimitri, ve Piço v. Kirko nâm zimmîler li-ecli’l-şehâde meclis-i şer‘a hâzırân olup istişhâd olunduklarında herbiri edâ-i şehâdet-i şer‘iyye edip mürd-i merkūm Kurt târih-i mersûmda sâlifü’r-rakam [İ]vana’ya zikri mürûr eden menzili vech-i muharrer üzere hibe ve teslîm edip lâkin sulbü akd-i hibede mürd olunca beni infâk edersen hibe ettim deyu şart eylemişidi şart-ı mezbûr hibe-i mahkiyeyi mubtil olmağın rücû‘ edip târih-i mezbûrede menzil-i mezbûru merkūm Hıristodoli’ye meblağ-ı ma‘hûdü’l-kadr iki bin dört yüz elli akçeye bey‘-i bâtla bey‘ edip kabz-ı semen ve teslîm-i semen eyledi biz bu husûsa minvâl-i muharrer üzere şâhidleriz şehâdet dahi ederiz dediklerinde gıbbe ri‘âyeti şerâiti’l-kabûl şehâdetleri hayyiz-i kabûlde vâkı‘a oldukdan sonra menzil-i mezbûr mûmâ-ileyh Hıristodoli’ye hükmolunup mâ-hüve’l-vâki‘ bi’t-taleb ketb ve imlâ olunup yed-i tâlibe def‘ olundu. Tahrîren fi’l-yevmi’l-hâmis aşer min-Şa‘bâni’l-mu‘azzam li-sene semân ve sittîn ve elf. Şühûdü’l-hâl: Fahrü’l-kuzât Abdülkerim Efendi, Hasan Çelebi el-kâtib, Ahmed Çelebi b. Mehmed el-kâtib, Ahmed Çelebi el-muhzır, İsmail Çelebi el-muhzır.