Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 656 Hüküm no: 697 Orijinal metin no: [107b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vulçıtrın Sancağı ile Üsküb ve Kratova nezaretini mutasarrıf olan Mahmud Paşa’nın Üsküb kazasındaki bazı emlak, arazi ve hayvanlarını İbrahim Çelebi b. Hasan’a sattığı Bi’l-fi‘il ber-vech-i arpalık Vulçıtrın Sancağı ve Üsküb ve Kratova nezâretini mutasarrıf olan emîrü’l-ümerâ’i’l-kirâm Mahmud Paşa tarafından bey‘-i âti’z-zikri ikrâra vekîl olup vekâlet-i mahkiyesi Bayram Ağa b. Mustafa ve Abdünnebi b. Veli şehâdetleriyle sâbite olan Osman Paşa kethüdâsı Ahmed Ağa b. Abdünnebi meclis-i şer‘-i hatîr-i lâzimü’t-tevkīrde mahmiye-i Üsküb mahallâtından Kadiriler mahallesi sükkânından sâhibü’l-kitâb İbrahim Çelebi b. Hasan nâm kimesne mahzarında ikrâr-ı tâm ve ta‘bîr-i merâm edip Üsküb kazâsına tâbi‘ Ağaköyü dâhilinde inde’l-cîrân ma‘lûmetü’l-hudûd dâhilen iki bâb beyti ve kileri ve sofayı ve iki anbarı ve fırını ve bi’r-i mâyı ve zevât-ı eşcâr-ı müsmire arsayı ve hâricen bir bâb beyti ve ahırı ve sofayı ve samanlığı ve harman yerini ve bir bâb demirci dükkânını ve bi’r-i mâyı ve arsayı muhtevî olup çiftlik ta‘bîr olunur musakkafâtı ve bir re’s ineği ve buzağıyı ve bir re’s yunduyla bi-cümleti’l-hudûd ve karye-i mezbûre haddinde vâki‘ lede’l-ahâlî ve’l-cîrân ma‘lûmetü’l-hudûd sekiz çapalık iki kıt‘a bağları ve Rahmanlı nâm karye haddinde vâki‘ ma‘lûmetü’l-hudûd tahmînen ( ) çapalık diğer iki kıt‘a bağları ve yine Ağaköyü dâhilinde vâki‘ koyun kışlasını mûmâ-ileyh Mahmud Paşa bi-safkatin vâhidetin on bin fıddî râyic fi’l-vakt akçeye mezbûr İbrahim Çelebi’ye bâtten bey‘ ve teslîm eyledi hâlâ semeni olan meblağ-ı ma‘hûdü’l-kadri yedinden tamâmen ahz u kabz edip emlâk-i mezbûreyi mahallinde kabza taslît eyledim ba‘de’l-yevm emlâk-i mezbûra sâlifü’z-zikr İbrahim’in mülk-i müşterâsıdır keyfe mâ yeşâ ve yahtâr mutasarrıf olsun dedi dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb ve imlâ olunup yed-i tâlibe def‘ olundu cerâ zâlike ve hurrire. Fi’l-yevmi’s-sâlis aşer min-Şa‘bâni’l-mu‘azzam li-sene semân ve sittîn ve elf. Şühûdü’l-hâl: Ali Çelebi, Fahrü’l-emsâl Hasan Paşazâde Yusuf Bey, Mehmed Çelebi tâbi‘-i Mahmud Paşa, Abdürrahim Bey kethüdâ-yı Mahmud Paşa, Hüseyin Çavuş tâbi‘-i Mahmud Paşa, Mehmed Çavuş tâbi‘-i Mahmud Paşa, Musâhib Beşir Ağa’nın kethüdâsı Mustafa Ağa, Abdullah b. Veli.