Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 657 Hüküm no: 698 Orijinal metin no: [108a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mühtedi Mehmed b. Abdullah’ın Ermeni Marat b. Ahi Nazar aleyhine açtığı alacak davasından vazgeçip zimmetini ibra ettiği Efendi hazretleri imzâsıyladır. Dâru’s-saltanati’s-seniyye mahrûse-i Kostantıniyye’de Lanka kurbünde sâkin olup hâlâ mahmiye-i Edirne’de Hisarodası nâm mevzi‘de sâkin olan Mehmed b. Abdullah el-mühtedî meclis-i şer‘-i şerîf-i lâzimü’t-teşrîfde işbu bâ‘isü’s-sifr Marat b. Ahi Nazar nâm Ermeni muvâcehesinde bi’t-tav‘i’s-sâf ikrâr ve i‘tirâf edip târih-i kitâbdan sekiz sene mukaddem mezbûr Marat’a yirmi top serâser her topu yetmiş beş riyâlî guruşa olmak üzere cem‘an bin beş yüz riyâlî guruşa bey‘ ve teslîm mezbûr Marat dahi iştirâ ve teslîm ettikden sonra mecâlis-i mütekaddimede hükkâm-ı şer‘ huzûrlarında meblağ-ı mezbûru mesfûr Marat’dan da‘vâ ve taleb ettiğimde mezbûr inkâr-i kül ile inkâr edip ben dahi isbâta kādir olamamağla târih-i kitâba gelince beynimizde defa‘ât ile münâza‘ât ve muhâsamât vâkı‘a olmuşidi el-hâletü hâzihî meblağ-ı mersûm bin beş yüz riyâlî guruşu mesfûr Marat’dan da‘vâdan fâriğ olup mezbûr Marat’ın zimmetini meblağ-ı merkūm da‘vâsından ibrâ-i âmm-ı kātı‘u’n-nizâ‘ ile ibrâ ve ıskāt eyledim ba‘de’l-yevm husûs-ı mezbûra müte‘allik mersûm Marat ile da‘vâ ve nizâ‘ım yokdur eğer benden meblağ-ı mezbûra müte‘allika Marat üzerine da‘vâ asâleten veyâ vekâleten sâdıra olursa lede’l-hükkâm mesmû‘a olmaya deyu ikrâr ve ibrâ etdikde mukırr-ı mezbûrun minvâl-i meşrûh üzere cârî olan ikrâr ve ibrâsını el-mukarru lehü’l-mezbûr Marat bi’l-müvâcehe tasdîk ve bi’l-müşâfehe tahkīk etmeğin mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Şa‘bâni’l-mu‘azzam li-sene semân ve sittîn ve elf. Şühûdü’l-hâl: Fahrü’l-kuzât Ali Efendi b. el-Hâc Mustafa, Siyavuş Bey b. Abdullah el-cündi, Halil Bey b. Eyüb el-cündi, Ahmed Çavuş b. Süleyman el-mübâşir, Ali Çavuş b. Ahmed el-mübâşir, Bayram Beşe b. Mahmud.