Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 659 Hüküm no: 700 Orijinal metin no: [108a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Ahmed’in hayatta iken vasisi olan merhum İsmail’de alacağı olduğu iddiasıyla merhumun oğlu aleyhine açtığı davada haksız olduğunun anlaşıldığı Kasaba-i Cisr-i Mustafapaşa mahallâtından Câmi‘-i şerîf mahallesi sükkânından iken bundan akdem müteveffâ olan Ahmed b. İnebey nâm kimesnenin sulbî kebîr oğlu Mustafa nâm kimesnenin meclis-i şer‘de yine mahalle-i mezbûre sükkânından iken müteveffâ olan İsmail nâm kimesnenin sulbî kebîr oğlu bâ‘isü’l-kitâb Mehmed mahzarında takrîr-i da‘vâ edip mezbûr Mehmed’in babası mezbûr İsmail hâl-i hayâtında benim vasîm olmağla on sekiz bin on beş akçe muhallefâtını ahz u kabz edip sekiz bin dokuz yüz akçesi ihrâcât olup dokuz bin elli beş akçesi sahhu’l-bâkī olup müteveffâ olmağla zimmetinde bâkī kalır mezbûr Mehmed dahi muhallefâtına vâzı‘u’l-yed olmağla meblağ-ı mezbûr dokuz bin elli beş akçeyi taleb ederim dedikde gıbbe’s-suâl mezbûr Mehmed cevâbında fi’l-vâki‘ babam müteveffâ-yı mezbûr İsmail hâl-i hayâtında mezbûr Mustafa’nın vasiyy-i şer‘îsi olup vech-i meşrûh üzere on sekiz bin on beş akçeyi kabz edip hâl-i hayâtında sekiz bin dokuz yüz altmış akçe ihracâtdan sonra dört bin altı yüz akçesini mezbûr Mustafa’ya teslîm edip mâ‘adâ dokuz bin elli beş akçesini babam mezbûrdan benden sonra kendi tarafından asâleten ve kız karındaşı Neslihan Hâtun tarafından vekâleten da‘vâ edip ben dahi meblağ-ı mezbûru hemen edâ ve teslîm edip mezbûr dahi tesellüm ve kabûl ve kabz edip zimmetimi muhallefât-ı mezbûreden ibrâ-i âm ile ibrâ ve ıskāt etdi deyu bin altmış sekiz senesi şehr-i Recebü’l-ferdinin gurresi târihi ile müverrah sâbıkā kasaba-i mezbûrede nâibü’ş-şer‘ olan Ali Efendi unvânı ile mu‘anvene hüccet-i şer‘iyye ibrâz etdikde müdde‘î-i mezbûr Mustafa’dan hakīkat-i hâl suâl olundukda mazmûn-ı hüccet-i mezkûreyi mukırr u mu‘terif olmağın mu‘ârazadan men‘ birle mâ-vaka‘a [bi’t-taleb] ketb olundu. Tahrîren fi’l-yevmi’s-sânî ve’l-ışrîn min şehri Şa‘bâni’l-mu‘azzam li-sene semân ve sittîn ve elf. Şühûdü’l-hâl: Ahmed Beşe b. Abdullah, Hasan b. Ali, Mustafa b. Hasan, Dilaver b. Abdullah, Mehmed b. Ali, Hüseyin b. Hasan ve gayruhüm.