Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 675 Hüküm no: 720 Orijinal metin no: [110b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Bey b. Ebubekir’in alacak davasında Hacı Ebubekir b. Abdurrahman ile kırk bin akçeye sulh olduğu Vilâyet-i Anadolu’da vâki‘ Ilgun (Ilgın) nâm kasaba muzâfâtında Döğer nâm karyede sâkin Halil Bey b. Ebûbekir nâm kimesneler meclis-i şer‘-i hatîr-i lâzimü’t-tevkīrde hâssa teberdârlardan râfi‘ü’l-kitâb el-Hâc Ebûbekir b. Abdurrahman mahzarında tav‘an ikrâr ve takrîr-i kelâm edip mezbûr el-Hâc Ebûbekir’e bundan akdem bana deruhde [ve] ilzâm ve yedinden kırk yedi bin nakd-i râyic fi’l-vakt akçe alıp kabz edip cibâyet-i mezbûrenin zabtı mümkün olmamağla mezbûr el-Hâc Ebûbekir’den meblağ-ı mezbûru taleb [ve] da‘vâ ettiğimde yedi bin akçesini inkâr etdikde mâ-beynimize Müslimûn tavassut edip sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr kırk bin akçeyi mezbûr el-Hâc Ebûbekir yedinden tamâmen alıp kabz edip min ba‘d mezbûr el-Hâc Ebûbekir ile husûs-ı mezbûra müte‘allik da‘vâ ve nizâ‘ım olmayıp meblağ-ı bâkī da‘vâsından zimmetini ibrâ-i âm ile ibrâ ve ıskāt ettim eğer mazmûn-ı kitâba muhâlefet benden asâleten [ve] vekâleten da‘vâ sâdıre olursa lede’l-hükkâmi’l-kirâm mesmû‘a olmaya dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min şehri Ramazâni’l-mübârek li-sene semân ve sittîn ve elf. Şühûdü’l-hâl: Ahmed Beşe b. Ali, Hasan b. Ali, Receb Ağa b. Ali, Abdülkadir Ağa el-müteferrika, Umdetü’l-ümerâ Hasan Bey ve gayruhüm.