Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 673 Hüküm no: 719 Orijinal metin no: [110b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun bt. Mustafa’nın Hazinedar Sinan Bey mahallesindeki menzilini vakfedip Yusuf Bey b. Abdullah’ı mütevelli tayin ettiği vakfiyesi Bu vakfiyenin muhâkemesi galat kayd olunup bu fakīr ba‘dehû tashîh edip derkenâr olunmuşdur. Gaflet olunmaya. Mehmed Nedim el-me’mûr bi-istimâ‘i’l-umûri’ş-şer‘iyyeti’l-askeriyye. Elhamdü lillâhi’l-lezî yücîbü min de‘âhu ve lâ-yektübu men câhe ve’s-salâtü ve’s-selâmü alâ hayrı halkihî Muhammed ellezî ıstafâhû ve alâ âlihî ve ashâbihî’l-lezîne etâ‘û hayr umûrı bi’r-ref‘? ammâ ba‘d fe-hâzihî hüccet-i sahîha-i şer‘iyye yu‘arrebu mazmûnuhâ mahmiye-i Edirne mahallâtından Hazînedâr Sinan Bey mahallesi sâkinelerinden mine’l-muhadderât tâcü’l-mestûrât Fâtıma Hâtun bt. el-merhûm Mustafa meclis-i şer‘-i şerîf-i lâzimü’t-teşrîfde vakf-ı âti’l-beyâna li-ecli’t-tescîl mütevellî nasb eylediği Yusuf Bey b. Abdullah mahzarında ikrâr-ı sahîh ve i‘tirâf-ı sarîh-i mer‘î kılınıp mahalle-i mezbûrede vâki‘ bir tarafı Yahya Hoca mülkü ve bir tarafı Bogasıcı Mustafa Dede mülkü ve bir tarafı Hasan Çelebi mülkü ve taraf-ı râbi‘i tarîk-ı âmla mahdûd bir beyt-i süflî ve iki beyt-i ulvî ve iki sofa ve bi’r-i mâ ve kenîfi ve muhavvatayı hâvî ve müştemil olan mülk menzilimi cemî‘ tevâbi‘ [ve] levâhıkı ile hasbeten lillâhi te‘âlâ ve taleben li-merzâtihî vakf-ı sahîh-i şer‘î ve habs-i sarîh-i mer‘î edip şöyle şart eyledim ki evvelâ menzil-i mezbûrun süknâsı ben hayatda oldukça nefs-i nefîsem sâkin ola vefâtımdan sonra evlâdıma ve evlâd-ı evlâdıma ale’s-seviyye beyne’z-zükûr ve’l-inâs lâ alâ sümuti’l-mîrâs ve ba‘de’l-inkırâz işbu hâzır bi’l-meclis olan haletem Münire Hâtun bt. Şa‘ban’a ba‘de vefâtihâ evlâdına ve evlâd-ı evlâdına ve ba‘de’l-inkırâz hâlete-i uhrâm Ümmügülsüm bt. Şa‘ban’a ba‘de vefâtihâ evlâdına ve evlâd-ı evlâdına ve ba‘de’l-inkırâzi’l-kül menzil-i mezbûr yed-i mütevelli ile istiğlâl-i müte‘âref üzere müteâref olan müctemi‘ olan gallât ile menzil-i mezbûr ta‘mîr ve termîm ola ba‘de’t-ta‘mîr fazlası mahalle-i mezbûre imâmına i‘tâ oluna al dahi mukābilesinde ba‘de sünneti salâti’l-fecr üç İhlâs-ı şerîf kırâat eyleye evvelâ kırâat eylediği İhlâs-ı şerîfin sevâbını resûl-i ekrem ve nebiyy-i muhterem Muhammed Mustafa sallâllâhu aleyhi ve sellem rûh-ı pür-fütûhlarına ihdâ eyleye sâniyyen kırâat eylediği İhlâs-ı şerîfin sevâbını vâkıfe-ı mezbûre rûhuna ihdâ eyleye sâlisen kırâat eylediği İhlâs-ı şerîfin sevâbını vâkıfe-i mezbûre ebeveyni zevclerine ihdâ eyleye deyu şart edip menzil-i mezbûru mütevellî-i mezkûre teslîm edip ol dahi minvâl-i muharrer üzere tesellüm ve kabûl ve kabz edip sâir evkāf mütevellîleri gibi vakfiyet üzere [tesellüm] etdi dedikde mukırre-i mezbûrenin ikrârını el-mukarru lehü’l-mezbûr Yusuf Bey vicâhen tasdîk ve şifâhen tahkīk ettikden sonra vâkıfe-i mezbûre mütevellî-i merkūm muvâcehesinde idâre-i kelâm edip vakf-ı akār ki İmâm-ı a‘zam ve hümâm-ı akdem mezheb-i şerîflerinde sahîhdir lâkin sıhhat lüzûmu müstelzim değildir ale’l-husûs imâm-ı sâlis İmâm Muhammed yanında vâkıf vakfın menâfi‘ini nefsine şart etmekle vakf-ı mezbûr ve ona müteferri‘ olan bâtıl olmağın vâkıfe-i mezkûre vakf-ı mezbûrun mülküme istirdâd olunmasın taleb ederim dedikde mütevellî-i mezbûr cevâbında eğerçi hâl bast olunan minvâl üzeredir lâkin imâm-ı sânî İmâm Ebû Yusuf hazretleri katında şart müfârık olsa da vakıf sahîh [ve] lâzım olmağla onların mezheb-i şerîfleri üzere vakf-ı mezbûrun sıhhat ve lüzûmuna hüküm taleb ederim deyu hâkim-i muvakkı‘-ı [sadr-ı] kitâb hazretlerine [mürâcaat] olduklarında hâkim-i müşârun-ileyh dahi cânib-i vakfı evlâ ve ahrâ görüp İmâm-ı mûmâ-ileyh mezheb-i şerîfleri üzere şart-ı mezbûr ile vakf-ı merkūmun sıhhat ve lüzûmuna hükmedip vakf-ı mezbûr sahîh ve lâzım olup cerâ zâlik hurrire. [mühür] (ketebehû’l-fakīr Mehmed Nedim) Fi’l-yevmi’s-sâdis min şehri Şa‘bâni’l-mu‘azzam li-sene semân ve sittîn ve elf. Şühûdü’l-hâl: Fahrü’l-mevâlî’l-kirâm ekmelü’l-vusalâ’i’l-fihâm Abdülhalim Efendi el-Kādî bi-medîneti Yenişehir sâbıkā, Umdetü’l-müderrisîni’l-kirâm zübdetü’l-ulemâ’i’l-a‘lâm Cenâb-ı Hâfız Efendi el-müderris, Fahrü’l-müderrisîn İbrahim Efendi, Fahrü’l-a‘yân Osman Ağa, Yunus Efendi b. Yusuf, Yusuf Bey b. Mehmed an-saray-ı atîk, diğer Yusuf Bey b. Abdullah, Dilaver Bey b. Abdullah, Mehmed b. el-Hâc Sefer, Ahmed Ağa b. Mustafa ve gayruhüm.