Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 676 Hüküm no: 722 Orijinal metin no: [110b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Himmet’in Halil b. Mehmed’den satın aldığı bağı bin kırk akçeye merhumun torunlarına devrettiği Mahmiye-i Edirne mahallâtından Hazînedâr Sinan Bey mahallesinde sâkin iken bundan akdem müteveffâ olan Halil [b.] Mehmed nâm kimesnenin bağına vâzı‘u’l-yed olduğunu mukırr [u] mu‘terif Mehmed b. Himmet nâm kimesne meclis-i şer‘-i hatîr-i lâzimü’t-tevkīrde mahalle-i mezbûrede sâkin olup târih-i kitâbdan iki sene mukaddem gāib olan Mahmud nâm kimesnenin evlâd-ı sıgārına nâzır olan Âişe bt. İsa nâm hâtun mahzarında bi-tav‘ihî ikrâr ve takrîr-i kelâm edip sıgār-ı mezbûrînin cedleri olup bundan akdem müteveffâ olan mezbûr Halil bana hâl-i nez‘inde silk-i mülkünde münselik olup mahmiye-i mezbûre kurbünde Topyolu nâm mevzi‘de vâki‘ bir tarafı İsmail bağı ve bir tarafı diğer İsmail bağı ve bir tarafı benim mülküm ve bir tarafı tarîk-ı âm ile mahdûd mülk bir kıt‘a bağını altı yüz elli akçeye bey‘ ve tarafından Bayram nâm kimesneyi vekîl edip hüccet-i şer‘iyye olunmuşdu ba‘de vefâtihî mârrü’z-zikr bağ semen-i misli ile bey‘ olunmayıp üç bin akçe bahâsı vardır deyu sıgār-ı mezbûrûn vasîleri olan Ahmed Beşe nâm kimesne da‘vâ ve taleb etdikde ben dahi dört yüz elli akçe harc [u] sarf etmişidim el-hâletü hâzihî vasiyy-i mezbûr bana bin kırk akçe def‘ ve teslîm edip ben dahi bağ-ı mezbûrun sıgār-ı mezkûrîne ferâğ edip ba‘de’l-yevm mârrü’z-zikr bağda kat‘â alâka ve müdâhalem kalmamışdır bağ-ı mezbûr da‘vâsından zimmetleri ibrâ-i âm ile ibrâ ve ıskāt ettim eğer mazmûn-ı kitâba muhâlif benden bi’l-asâle ve bi’l-vekâle da‘vâ sâdır olursa lede’l-hükkâmi’l-kirâm mesmû‘ olmaya dedikde gıbbe’t-tasdîk mâ-vaka‘a bi’t-taleb ketb olundu. Tahrîren fi’l-yevmi’l-ışrîn min şehri Ramazâni’l-mübârek li-sene semân ve sittîn ve elf. Şühûdü’l-hâl: Ahmed Beşe b. Ali, Mehmed b. Ali, Hasan b. Ali, Mustafa Dede b. Ahmed ve gayruhüm.