Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 687 Hüküm no: 736 Orijinal metin no: [113a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı cariye Belkıs’ın sahibesi Âlime Hatun tarafından azat edildiğini şahitlerle ispat ettiği İtâknâme-i Belkıs İşbu râfi‘atü’l-kitâb orta boylu göğ gözlü Rusiyyetü’l-asl Belkıs bt. Abdullah meclis-i şer‘-i şerîf-i şâmihu’l-imâd ve mahfil-i din-i münîf-i râsihu’l-erkânda bundan akdem mâlikesi olan Âlime Hâtun bt. Kurd mahzarında üzerine takrîr-i da‘vâ edip mezbûre Âlime Hâtun’un yirmi sene mikdârı câriyesi ve memlûkesi olup târih-i kitâbdan dört ay mukaddem hasbeten lillâhi te‘âlâ mahzar-ı Müslimînde malından beni i‘tâk ve mülkünden ıtlâk etmişiken hâlâ beni rıkkiyyet üzere istihdâm eder suâl olunup ihkāk-ı [hak] olunması matlûbumdur dedikde gıbbe’s-suâl ve akībe’l-inkâr mezbûre Belkıs’dan müdde‘âsını mübeyyine beyyine taleb olundukda udûl-i ricâlden Hasan Efendi b. Ahmed ve İlyas Dede b. Sinan nâm kimesneler li-ecli’ş-şehâde meclis-i şer‘a hâzırân olup gıbbe istişhâdi’ş-şer‘î fi’l-vâki‘ mezbûre Âlime Hâtun târih-i kitâbdan dört ay mukaddem bizim huzûrumuzda câriye-i memlûkesi mezbûre Belkıs’ı hasbeten lillâhi te‘âlâ mâlından i‘tâk ve mülkünden ıtlâk edip sâir harâir-i asliyyât gibi hürre olsun ve ba‘de’l-yevm üzerinde hakk-ı velâdan gayrı hakkım kalmamışdır deyu ikrâr ve bizi işhâd etdi biz bu husûsa şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a oldukdan sonra mûcibiyle hüküm birle mâ-vaka‘a bi’t-taleb ketb olundu. Tahrîren fi’l-yevmi’s-sâmin min-Şevvâli’l-mükerrem li-sene semân ve sittîn ve elf min hicreti men lehü’l-izzü ve’ş-şeref. Şühûdü’l-hâl: Kutb[eddîn] İsmail Efendi b. Hürrem Şah, Rıdvan Ağa b. Abdullah, Mehmed Bey b. Abdullah, Mehmed Bey b. Abdullah, Hasan Dede b. Ali, Halil Bey b. Eyüb, Ahmed b. Abdullah, Hasan b. Ali ve gayruhüm.