Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 686 Hüküm no: 735 Orijinal metin no: [113a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hanım bt. Salih Paşa’nın Eyüp’teki bazı emlak, eşya ve hayvanlarını Abdullah Bey b. İbrahim Paşa’ya yüz bin akçeye sattığı Mahmiye-i İstanbul’da sâkine fahrü’l-muhadderât tâcü’l-mestûrât Afîfe Hânım bt. el-merhûm Salih Paşa tarafından bey‘-i âti’z-zikri ikrâra vekîl olup mezbûreyi ma‘rifet-i şer‘iyye ile ârifân olan Ali Bey b. Ca‘fer ve Ahmed Bey b. Mehmed nâm kimesneler şehâdetleri ile şer‘an vekâleti sâbite olan kıdvetü’l-emâsil ve’l-ekârim câmi‘u’l-mehâmid ve’l-mekârim zevci Hüseyin Bey b. Mustafa nâm kimesne mahmiye-i Edirne’de meclis-i şer‘de hâlâ şıkk-ı evvel defterdârı olan câmi‘u’l-emvâli’s-sultâniyye hâfızu’l-hazâini’l-hakaniyye İbrahim Paşa hazretlerinin sulbî oğlu iftihâru’l-emâcid ve’l-ekârim Abdullah Bey tarafından ikrâr-ı âti’l-beyânı tasdîka vekîl-i sâbitü’l-vekâlesi olup mîr-i kıbtiyân olan Hasan Ağa b. Ali mahzarında bi’l-vekâle ikrâr-ı tâm ve takrîr-i kelâm edip müvekkile-i müşârun-ileyhânın mülkünde olup medîne-i Ebî Eyyüb el-Ensârî -aleyhi’r-rahmetü’l-bârî- kurbünde Topçular nâm mevzi‘de vâki‘ lede’l-ahâlî ma‘lûmü’l-hudûd dâhiliyesi beş fevkānî odayı ve bir hamamı ve iki kileri ve bir sofayı ve bir şâdü’r-revânı ve bir matbahı ve üç göz bir anbarı ve kurbünde bir odayı ve bir ahırı ve bir samanlığı ve bir sundurmayı ve fırını ve bi’r-i mâyı ve kenîfi ve eşcâr-ı müsmire ve gayr-ı müsmire bahçemi ve hâriciyesi bir kebîr ahırı ve önünde iki odayı ve bir bostan ve dolabını ve eşcâr-ı müsmire ve gayr-ı müsmire bahçeyi ve içinde iki fevkānî odayı ve iki bi’r-i mâyı müştemil arsanın merhûm-ı mûmâ-ileyh vakfı ile merhûm Mahmud Paşa Vakfı’na senede yedi bin akçe mukāta‘ası olup ebniye [ve] eşcârı mülkü olan Salih Paşa Çiftliği ta‘bîr olunur menzili ile kurbünde vâki‘ ma‘lûmü’l-hudûd tahmînen altı dönüm bağını ve çiftlik-i mezbûrda mevcûd dört re’s karasığır öküzü ve iki sabanı demirleriyle ve iki araba ve sâir beynlerinde ma‘lûm âlât-ı çifti safka-i vâhide ile müvekkil-i müşârun-ileyh Abdullah Bey’e yüz bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i muharrer üzere iştirâ ve kabûl eyledikden sonra çiftlik-i mezkûr ile ma‘an tasarruf olunup herbirinin hudûdu tahdîd ve tavsîfden müstağnî on beş kıt‘a tarla ve iki kıt‘a çayırın dahi hakk-ı tasarrufunu ma‘rifet-i sâhib-i arz ile mûmâ-ileyh Abdullah Bey’e seksen bin nakd-i râyic fi’l-vakt akçe mukābilesinde ferâğ ve tefvîz edip ol dahi tefevvüz ve kabûl eyleyip semen-i merkūm ile bedel-i mezkûr cem‘an yüz seksen bin akçeyi müşârun-ileyh Abdullah Bey yedinden bi’t-tamâm ve’l-kemâl ahz u kabz edip zikrolunan emlâki mülkiyet üzere ve zikri mürûr eden tarla ve çayırları sâir emsâli tasarrufu gibi mutasarrıf olmak için mûmâ-ileyh Abdullah Bey’i mahallinde kabza taslît eyledi dedikde vekîl-i mezkûr Hüseyin Bey’in cârî ve sâdır olan ikrârını vekîl-i mezbûr Hasan Ağa vicâhen ve şifâhen tasdîk ve tahkīk edicek mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min Ramazâni’l-mübârek li-sene semân ve sittîn ve elf. Şühûdü’l-hâl: El-hâc Mehmed Bey, Hüseyin Ağa b. Hüseyin, Mehmed Ağa b. Hasan Ağa, Ali Çelebi, Handan Bey, Mehmed b. Mustafa ve gayruhüm.